بابا بلھے شاہ رانجھا جوگیڑا بن آیا ۔ بلھے شاہ

[فرخ منظور]

رانجھا جوگیڑا بن آیا
واہ سانگھی سانگ رچایا

ایس جوگی دے نین کٹورے
بازاں وانگوں لیندے ڈورے
مُکھ ڈٹھیاں دُکھ جاون جھورے
ایہناں اکھیاں لعل لکھایا

رانجھا جوگیڑا بن آیا
واہ سانگھی سانگ رچایا

ایس جوگی دی ایہہ نشانی
کن وچ مندراں گل وچ گانی
صورت اس دی یوسف ثانی
اس الفوں احد بنایا

رانجھا جوگیڑا بن آیا
واہ سانگھی سانگ رچایا

رانجھا جوگی تے میں جوگیانی
اس دی خاطر بھرساں پانی
اینویں پچھلی عمر وہانی
اُس مینوں ہن بھرمایا

رانجھا جوگیڑا بن آیا
واہ سانگھی سانگ رچایا

بلھا شوہ دی ایہہ گت پائے
پیت پرانی شور مچائے
ایہہ گل کیکوں چھپے چھپائے
نی تخت ہزاریوں دھایا

رانجھا جوگیڑا بن آیا
واہ سانگھی سانگ رچایا

(بلھے شاہ)

 

[Saraah]

بوہت خوبصورت کلام اے پر ایہدی سلیس پنجابی وی کرو تے میں ہن ایہ نہیں جے سننا کہ توانوں وی نہیں آندی ۔۔۔۔

خاص کر ایہدا مطلب سمجھاو
صورت اس دی یوسف ثانی
اس الفوں احد بنایا----------------
اینویں پچھلی عمر وہانی
اُس مینوں ہن بھرمایا

رانجھا جوگیڑا بن آیا
واہ سانگھی سانگ رچایا

بلھا شوہ دی ایہہ گت پائے
پیت پرانی شور مچائے
ایہہ گل کیکوں چھپے چھپائے
نی تخت ہزاریوں دھایا