رسم دلبری تازہ

[شاکرالقادری]

نعتِ سرور عالم
صلی اللہ علیہ وآلہ وسلم
شاکرالقادری

حرم کی تیرہ شبی جس سے مستنیر ہوئی
حرا کی کوکھ سے پھوٹی ہے روشنی تازہ
بہار قلب ونظر کا ہوا سماں پیدا
نہال دل میں کھلیں کونپلیں کئی تازہ
صدا کو زمزمہ نو حروف کو معنی
ملی مغنی جاں کو بھی نغمگی تازہ
ترے ثبات سے عزم حسینؓ زندہ ہے
ترے جلال سے ہے ضرب حیدریؓ تازہ
ہے تیرے ساز سے پرسوز سینہ حبشیؓ
ہے تیرے فقر سے روحِ ابوذریؓ تازہ
فروغ جلوہ گہِ کن ترے ہی دم سے ہے
"ترے کرم سے ہے بستانِ زندگی تازہ"
پڑے جبیں پہ شکن تو فلک لرز اٹھے
تو مسکرائے، تو ہو رسم دلبری تازہ
ترے پیام سے فکر و شعور چونک اٹھے
ملی تعجب و حیرت کو آگہی تازہ
ترے مزاج سے تہذیب کی ہوئی تذہیب
ملی تمدنِ بے جاں کو زندگی تازہ
کتاب دل کو عطا کی ہے شرحِ نو تونے
حدیث شوق کو بخشی ہے دل کشی تازہ
ترے نثار دگر گوں ہے حال امت کا
سجا رہا ہے جہاں بزم کافری تازہ
عطا ہو پھر دل مسلم کو حیدری جوہر
فضائے صحن حرم میں ہے ابتری تازہ
​

 

[فرخ منظور]

واہ واہ! کیا ہی خوبصورت نعت ہے۔ بہت شکریہ شاکر صاحب! جزاک اللہ!

 

[محمد وارث]

خوبصورت نعت ہے شاکر القادری صاحب، جذبے سے بھر پور، جزاک اللہ۔

بہت داد قبول کیجیئے محترم۔

 

[الف نظامی]

ترے ثبات سے عزم حسینؓ زندہ ہے
ترے جلال سے ہے ضرب حیدریؓ تازہ
۔
ترے پیام سے فکر و شعور چونک اٹھے
ملی تعجب و حیرت کو آگہی تازہ
۔
عطا ہو پھر دل مسلم کو حیدری جوہر
فضائے صحن حرم میں ہے ابتری تازہ