طارق شاہ
محفلین
غزل
رقم کریں گے تِرا نام اِنتسابوں میں
کہ اِنتخابِ سُخن ہے یہ اِنتخابوں میں
مِری بَھری ہُوئی آنکھوں کو چشمِ کم سے نہ دیکھ
کہ آسمان مُقیّد ہیں، اِن حبابوں میں
ہر آن دِل سے اُلجھتے ہیں دو جہان کے غم
گِھرا ہے ایک کبُوتر کئی عقابوں میں
ذرا سُنو تو سہی کان دھر کے نالۂ دِل
یہ داستاں نہ ملے گی تمھیں کِتابوں میں
نئی بہار دِکھاتے ہیں داغِ دِل ،ہر روز
یہی تو وصف ہے اِس باغ کے گُلابوں میں
پَوَن چَلی تو ، گُل و برگ دف بجانے لگے
اُداس خوشبوئیں لَو دے اُٹھیں نِقابوں میں
ہَوا چلی، تو کُھلے بادبانِ طبع رَسا
سفینے چلنے لگے یاد کے سرابوں میں
کُچھ اِس ادا سے اُڑا جا رہا ہے ابلقِ رنگ
صبا کے پاؤں ٹھہرتے نہیں رکابوں میں
بدلتا وقت یہ کہتا ہے ہر گھڑِی ناصؔر
کہ یادگار ہے یہ وقت اِنقلابوں میں
ناصؔر کاظمی
