طارق شاہ
محفلین
غزل
شفیق خلؔش
رنجشوں کو دِل میں تم اپنے جگہ دینے لگے
غم ہی کیا کم تھے جو اَب یوں بھی سزا دینے لگے
خواہشیں دِل کی دبانےسے کہیں دبتی ہیں کیا
بُھول کرمیری وفاؤں کو جفا دینے لگے
یوں تمھاری یاد نے فُرقت کا عادی کردِیا
ہجرکےغم بھی بالآخر اب مزہ دینے لگے
کیا یہ تجدِیدِ محبّت ہی عِلاجِ دِل بھی ہے
آپ بیمارِ محبّت کو دَوا دینے لگے
باغ میں میرے سُلگتے آشیاں کو دیکھ کر
"جن پہ تکیہ تھا وہی پتے ہَوا دینے لگے"
کیوں ہُوئے مرنے پہ راضی، بات آخر کیا ہُوئی
کیا کفن کو وہ تمہیں اپنی قبا دینے لگے
زندگی بھر جن کو سُننے کی تڑپ دِل میں رہی
اُٹھ گئے جب ہم جہاں سے تب صدا دینے لگے
رزقِ غم کی یُوں ہُوئی دُنیا میں قِسمت سے تلاش
سب کے سب اُس کو ہمارا ہی پتہ دینے لگے
کیا نہ دعویٰ عِشق میں، حاصل سے پہلے تھا تمھیں
کیا طبیعت بھر گئی جو، یُوں سزا دینے لگے
مُنتظر جب ہم رہے، آیا نہ اُن کو کُچھ خیال !
بُجھ گئے جب دِل کے جذبے تب ہَوا دینے لگے
اِک اگر ہو، تو کریں شکوہ ہم اُس کی ذات سے
ہم کو سارے ہی خلش مِل کر سزا دینے لگے
شفیق خلؔش