ریاض خیر آبادی کی مزاحیہ شاعری

[کاشفی]

ریاض خیر آبادی کی مزاحیہ شاعری
تعارفِ شاعر: سید ریاض احمد نام، ریاض تخلص تھا۔ 1855ء میں بمقام خیرآباد پیدا ہوئے۔ جوانی کا زمانہ گورکھپور میں گزارا۔ یہ شعر گورکھپور کی صحبت کا مظہر ؎
وہ گلیاں یاد آتی ہیں جوانی جن میں کھوئی ہے
بڑٰی حسرت سے لب پر ذکر گورکھپور آتا ہے

امیر مینائی کے شاگرد تھے۔ ریاض الاخبار، گلکدہء ریاض، فتنہ اور عطرفتنہ رسالے اور اخبار جاری کئے۔ انگریزی ناول کا ترجمہ بھی کیا۔ ناول "ناشاد"ان کی یاد ہے۔

20 جولائی 1932ء کو انتقال فرمایا۔ان کا دیوان "دیوانِ ریاض"کے نام سے شائع ہوا۔

ریاض بڑی شوخ طبیعت کے مالک تھے۔ شراب کے مضامین سے متعلق انہوں نے سینکڑوں شعر کہے ہیں۔ جن کا جواب کہیں اور نہیں ملتا۔ وہ روزہ اور نماز کے پابند تھے۔ شراب عمر بھر چکھی نہیں ۔ لیکن شراب پینے والوں سے زیادہ رنگین مزاجی ان کے اشعار سے ظاہر ہوتی ہے۔

خدا ان کو جنت میں اعلیٰ مقام عطا فرمائے۔۔آمین۔

 

[کاشفی]

کچھ عجب طرح کے ہیں رند ریاض
آپ پیتے نہیں، پلاتے ہیں
۔۔۔۔۔۔۔۔۔۔۔
دست شفقت اس طرح اک رند نے پھیرا ریاض
بیٹھ کر یاد خدا میں جھومتا جاتا رہا
۔۔۔۔۔۔۔۔۔۔۔
یاں وہ لے دے ہوئی آکر کہ الہٰی توبہ
ہم سمجھتے تھے کہ محشر میں تماشا ہوگا

 

[کاشفی]

یہ دن ہے حشر کا، ہو کر رہے گا وہ جو ہونا ہے
ارے جھوٹے کچھ اب قول و قسم سے ہو نہیں سکتا
۔۔۔۔۔۔۔۔۔
چھپ کے راتوں کو کہیں آپ نہ آئے نہ گئے
بے سبب نام ہوا آپ کا روشن کیسا
۔۔۔۔۔۔۔۔۔۔۔۔
مے چھین کر کسی سے جو پیتے تو تھی خطا
جب دام دے کے پی تو گنہ کیا کسی کا تھا

یہ اپنی وضع اور یہ دشنامِ مے فروش
سن کر جو پی گئے یہ مزا مفلسی کا تھا

 

[کاشفی]

چُن چُن کے آج شیخ نے انگور کھا لئے
اب کیا رہا ہے تاک کا حاصل نکل گیا
۔۔۔۔۔۔۔۔۔۔
نیچی داڑھی نے آبرو رکھ لی
قرض پی آئے اک دکان سے آج
۔۔۔۔۔۔۔۔۔۔۔۔
جنابِ شیخ نے جب پی تو منہ بنا کے کہا
مزا بھی تلخ ہے کچھ بو بھی خوشگوار نہیں

حنا لگا کے پہنچتے ہیں گلرخوں میں ریاض
کچھ ان کی ریش مبارک کا اعتبار نہیں

 

[کاشفی]

یہ اُلجھے ہیں رندوں سے کیوں شیخ صاحب
بڑھاپے میں کیوں داڑھی رنگوارہے ہیں
۔۔۔۔۔۔۔۔۔
شب کو میخانے میں کیوں پہنچے تھے اے حضرت شیخ
کہئے اچھی تو کٹی قبلہ حاجات کی رات
۔۔۔۔۔۔۔۔۔۔
اک ٹیپ ماری زور سے زاہد کے اے ریاض
اب ہاتھ مل رہے ہیں کہ اچھی پڑی نہیں

بوتل کا کاگ زور میں توبہ لے اُڑا
ہم من چلوں کے ہاتھ کی گولی رکی نہیں

 

[کاشفی]

شیخ صاحب کیا چھپا کر لے چلے رومال میں
کچھ نہ کچھ حصہ رہے یاروں کا بھی اس مال میں
۔۔۔۔۔۔۔۔۔۔
ریاض آئے تو لوگوں نے میکدہ میں کہا
کہاں یہ آج بزرگ فرشتہ خو آئے
۔۔۔۔۔۔۔۔۔۔۔۔
اہلِ حرم میں جا کے بنا آج شیخِ وقت
کافر ریاض پیرکلیسا کہیں جسے

 

[کاشفی]

آئے میخانے میں جب مسجد جامع سے ریاض
ساتھ ہی آپ کے قبلے سے گھٹا بھی آئی
۔۔۔۔۔۔۔۔۔۔۔۔۔
سربزم واعظ سے دبنا پڑا
وہ خُم سے سوا تھا تن و توش میں
۔۔۔۔۔۔۔۔
واعظ انگور میں ہے دخترِ رز رو بہ نقاب
آنکھیں پھوٹیں جو ادھر تاک لگائے کوئی

 

[کاشفی]

آگے کچھ بڑھ کر ملے گی مسجد جامع ریاض
اک ذرا مڑ جائیے گا میکدے کے در سے آپ
۔۔۔۔۔۔۔
پی پی کے اس نے سجدے کئے ہیں تمام رات
اللہ رے شغل زاہدِ شب زندہ دار کا
۔۔۔۔۔۔۔۔۔۔۔
یہ مئے تلخ ترے منہ سے لگی ہے کہ نہیں
سچ بتا دے ارے زاہد کبھی پی ہے کہ نہیں

 

[کاشفی]

اٹھے کبھی گھبرا کے تو میخانے میں ہو آئے
پی آئے تو پھر بیٹھ رہے یادِ خدا میں
۔۔۔۔۔۔۔۔۔۔۔
در توبہ نہیں جو بند بھی ہو
کھلا ہر وقت میخانے کا در ہے
۔۔۔۔۔۔۔۔۔۔۔۔۔۔۔
شیخ یہ کہتا گیا، پیتا گیا
ہے نہایت بدمزہ، اچھی نہیں

 

[کاشفی]

کیسا پینا، کہاں کی توبہ
اب میں ہوں، خدا ہے، بیخودی ہے
۔۔۔۔۔۔۔۔۔۔۔۔۔
شرماؤ ریاض مے کشی سے
لمبی داڑھی ہے ہاتھ بھر کی
۔۔۔۔۔۔۔۔۔۔۔۔۔
شیخ جی میکدہ وہ جنت ہے
تم بھی جا کر جوان ہوجاتے

 

[کاشفی]

خدمتِ میخانہ کرلے ورنہ شیخ
رائیگاں یہ زندگانی جائے گی

پینے آئیں تو فرشتہ خود ریاض
حور کے دامن میں چھانی جائے گی
۔۔۔۔۔۔۔۔۔۔
شراب خانے میں ہے رنگ میکشوں کا وہی
نہ خانقاہ نہ وہ اہل خانقاہ رہے
۔۔۔۔۔۔۔۔۔۔۔۔
توبہ کرکے آج پھر پی لی ریاض
کیا کیا کمبخت تونے کیا کیا

 

[کاشفی]

اچھی پی لی، خراب پی لی
جیسی پائی، شراب پی لی

پی لی ہم نے شراب پی لی
تھی آپ مثال آب پی لی

عادت سی ہے، نشہ ہے نہ اب کیف
پانی نہ پیا، شراب پی لی

 

[طاہر راجپوت ملتان]

گئے مے خانوں سے کتنے حرّم کو خانقاہوں کو
ہم اک رہ گئے ہیں اب پُرانے بادہ خواروں میں

چھلکتے جام کی موجیں نگاہیں جن کی بنتی ہیں
نہیں پیتے کچھ ایسے مست بھی ہیں میگساروں میں

سید ریاضؔ احمد خیرآبادی
1853-1934خیرآباد
کلیاتِ ریاضؔ ✍️