زنجیر کس کی ہےکہ قدم شاد ہوگئے

[ظہیراحمدظہیر]

زنجیر کس کی ہےکہ قدم شاد ہوگئے
بیڑی پہن کے لگتا ہے آزاد ہوگئے

جتنے بھی حرفِ سادہ ہوئے اُس سے منتسب
ہم رنگِ نقش ِ مانئ و بہزاد ہوگئے

سنگِ سخن میں جوئے معانی کی جستجو !
گویا قلم بھی تیشئہ فرہاد ہوگئے

زندہ رہے اصولِ ضرورت کے ماتحت
جب چاہا زندگی نے ہم ایجاد ہوگئے

خود بیتی لگتی ہے مجھے ہر اک کی داستان
لگتا ہے ان گنت مرے ہمزاد ہوگئے

ق

آشوبِ احتیاج یہ کیسا ہے کیا کہیں
صبر و رضا کے لہجے بھی فریاد ہوگئے

آب و ہوائے شہر ِ ہوس کچھ نہ پو چھئے
برباد وہ ہوئے کہ جو آباد ہوگئے

-
بیداد گر ملے سبھی ہم طرز و ہم خیال
سارے ستم زبانی ہمیں یاد ہوگئے

ظہیر احمد ظہیر ۔۔۔۔۔۔۔۔۔ ۱۹۹۶

ٹیگ: سید عاطف علی محمد تابش صدیقی کاشف اختر فاتح​

 

[فاتح]

واہ واہ کیا خوب اشعار نکالے ہیں ظہیر بھائی

 

[محمد تابش صدیقی]

کیا کہنے ظہیر بھائی، بہت خوب

آشوبِ احتیاج یہ کیسا ہے کیا کہیں
صبر و رضا کے لہجے بھی فریاد ہوگئے

آب و ہوائے شہر ِ ہوس کچھ نہ پو چھئے
برباد وہ ہوئے کہ جو آباد ہوگئے