سحر میں لُطف نہیں اور شام بے رونق غزل نمبر 127 شاعر امین شارؔق

[امین شارق]

الف عین سر
مفاعِلن فَعِلاتن مفاعِلن فِعْلن

سحر میں لُطف نہیں اور شام بے رونق
ترے بغیر ہوئے سارے کام بے رونق

کہاں چلے مری دُنیا اُجاڑ کر ظالم
ہیں تیرے بِن مرے دیوار و بام بے رونق

خیالِ یار مرے دِل کو پِھر جِلا بخشو
ہمارے دِل کی ہے حالت مدام بے رونق

اے رِندوں، تِشنہ لبوں اِنتظار کُچھ کرلو
بغیرِ ساقی ہے یہ بزمِ جام بے رونق

کئی ہیں مست، کئی تِشنہ لب بھی ہیں ساقی
ہے تیرے مے کدے کا سب نظام بے رونق

ملالِ یار، غمِ عِشق، فُرقتِ جاناں
مقیم دِل میں ہوئے ہیں تمام بے رونق

بغور نیک و شریروں کی صُورتیں دیکھو
حلال ہے تر و تازہ حرام بے رونق

وگرنہ ایک قدح کش ہی آتا مسجد میں
ہے تیرا واعظِ ناداں کلام بے رونق

میں جانتا تھا اِنہیں پِھر وہ تازہ کردے گی
گُلاب بھیج دِیے اُس کے نام بے رونق

تری نِگاہ سے دِل کِھل اُٹھے مرا مُرشد
ہے چشمِ لُطف کا طالِب غُلام بے رونق

کہیں سے داد و ستائش نہ مِل سکی شارؔق
مری غزل کا ہوا اختتام بے رونق​

 

[الف عین]

اس قسم کی زمینیں مجھے خواہ مخواہ استادی کے اظہار کی زمینیں لگتی ہیں۔ کل اس کو نہیں دیکھ سکا

الف عین سر
مفاعِلن فَعِلاتن مفاعِلن فِعْلن

سحر میں لُطف نہیں اور شام بے رونق
ترے بغیر ہوئے سارے کام بے رونق​

کام بے رونق ہونا محاورہ نہیں

کہاں چلے مری دُنیا اُجاڑ کر ظالم
ہیں تیرے بِن مرے دیوار و بام بے رونق​

کہاں چلے.. سے مخاطب کا احترامی خطاب ہے، آپ/تم سے، دوسرے مصرع کا تو نہین، شتر گربہ ہے

خیالِ یار مرے دِل کو پِھر جِلا بخشو
ہمارے دِل کی ہے حالت مدام بے رونق​

حالت بھی بے رونق نہیں ہوا کرتی

اے رِندوں، تِشنہ لبوں اِنتظار کُچھ کرلو
بغیرِ ساقی ہے یہ بزمِ جام بے رونق​

ٹھیک، لیکن رندو/لبو ہونا چاہیے کہ ان سے خطاب ہے، اور "!" بھی

کئی ہیں مست، کئی تِشنہ لب بھی ہیں ساقی
ہے تیرے مے کدے کا سب نظام بے رونق​

دو لخت ہے، نظام بھی رونق دار نہیں ہوتا

ملالِ یار، غمِ عِشق، فُرقتِ جاناں
مقیم دِل میں ہوئے ہیں تمام بے رونق​

بے رونق کون ہیں؟ واضح نہیں

بغور نیک و شریروں کی صُورتیں دیکھو
حلال ہے تر و تازہ حرام بے رونق​

اس کا بیانیہ بھی عجیب ہے۔ چہرے کہنا ضروری ہے، نیکوں اور شریروں کہنا تھا

وگرنہ ایک قدح کش ہی آتا مسجد میں
ہے تیرا واعظِ ناداں کلام بے رونق

میں جانتا تھا اِنہیں پِھر وہ تازہ کردے گی
گُلاب بھیج دِیے اُس کے نام بے رونق

تری نِگاہ سے دِل کِھل اُٹھے مرا مُرشد
ہے چشمِ لُطف کا طالِب غُلام بے رونق​

یہ سب بے رونق نہیں ہوتے

کہیں سے داد و ستائش نہ مِل سکی شارؔق
مری غزل کا ہوا اختتام بے رونق​

درست