آتش سوتا ہوں ہاتھ گردنِ مینا میں ڈال کے ۔۔۔۔۔۔۔۔۔خواجہ حیدر علی آتش

[مدیحہ گیلانی]

زاہد فریفتہ ہیں مرے نونہال کے
عاشق بزرگ لوگ ہیں اس خورد سال کے

ہر شب شبِ برات ہے، ہر روز عید ہے
سوتا ہوں ہاتھ گردنِ مینا میں ڈال کے

مضمونِ رفتگاں ہے طبیعت کو اپنی ننگ
گاہک نہ ہوویں ہم کبھی مردے کے مال کے

شان و شکوہ نے ہمیں برباد کر دیا
مثلِ حباب اُڑ گئے خیمہ نکال کے

رنجِ خمار اٹھانے کی طاقت نہیں مجھے
پیتا ہوں میں شراب میں بھی لُون ڈال کے

بے عشق لوگ کہتے ہیں ماہِ چہاردہ
سُن کر مُقر ہوئے ہیں تمھارے کمال کے

اُس تُرک کی نگہ جو کرے ناوک افگنی
تودے لگائے خاکِ شہیداں کلال کے

سرمہ نہیں ہوا ہے تجلی سے طور ہی
ہم بھی ہیں سوختہ تری برقِ جمال کے

شامِ شبِ فراق سے پہلے مُوے جو لوگ
آئی ہوئی بلا گئے سر پر سے ٹال کے

اُس شمع رو کا واہ رے جسمِ گداز و صاف
اللہ نے بنایا ہے سانچے میں ڈھال کے

افعی ہے زلف، خال ہے افعی کی مردمک
عقدے کھلے یہ فکر سے اُس زلف و خال کے

آنکھوں میں اپنی رکھتے ہیں اہلِ نظر انھیں
سرمہ ہوئے ہیں پستے ہوئی تیری چال کے

اخوانِ دہر سے عجب اس کا نہ جانیے
یوسف کی فکر میں جو پھریں گُرگ پال کے

معنی کے شوق میں جو ہوا دل کو میلِ فکر
تصویر شعر بن گئے پُتلے خیال کے

سودائی جان کر تری چشمِ سیاہ کا
ڈھیلے لگاتے ہیں مجھے دیدے غزال کے

شک ہوتا تیرے ہاتھ کا، ہوتے جو اے صنم
پنجے میں آفتاب کے ناخن ہلال کے

آئینے سے کلام کو کیونکر کیا ہے صاف
حیرانِ کار ہم بھی ہیں آتش کے حال کے

خواجہ حیدر علی آتشؔ

 

[فاتح]

واہ واہ کیا ہی خوب کلاسک غزل لائی ہیں آپ۔۔۔ اس سے قبل اس کا صرف ایک ہی شعر سن رکھا تھا جو ضرب المثل بن چکا ہے
ہر شب شبِ برات ہے، ہر روز عید ہے
سوتا ہوں ہاتھ گردنِ مینا میں ڈال کے
اور اس کا مصرع اولیٰ بھی عوامی اصلاح کے ساتھ یعنی "ہر روز روزِ عید" کی شکل میں سن رکھا تھا۔ مکمل غزل پڑھوانے پر شکریہ

 

[مدیحہ گیلانی]

فاتح صاحب !
آپ کی ممنون ہوں کہ آپ کے دیے ہوئے ربط سے ہی ہمیں کلیات آتش ہاتھ لگی اور اسی میں سے یہ غزل ملی۔

 

[شیزان]

زبردست انتخاب اپیا

 

[فاتح]

فاتح صاحب !
آپ کی ممنون ہوں کہ آپ کے دیے ہوئے ربط سے ہی ہمیں کلیات آتش ہاتھ لگی اور اسی میں سے یہ غزل ملی۔

اور ہم نے بھی اسی ربط سے ڈاؤن لوڈ کی تھی لیکن یہ غزل آپ نے ڈھونڈ لی۔
یہ سراسر بے ایمانی ہے۔۔۔ آپ کو ہمارا شکریہ ادا کرنا چاہیے تھا پوسٹ کرتے ہوئے۔۔۔ ہاہاہا

 

[محب علوی]

عمدہ کلام ہے ۔

 

[مدیحہ گیلانی]

زبردست انتخاب اپیا

آپکا شکریہ ۔ جیتے رہیئے ۔

 

[مدیحہ گیلانی]

اور ہم نے بھی اسی ربط سے ڈاؤن لوڈ کی تھی لیکن یہ غزل آپ نے ڈھونڈ لی۔
یہ سراسر بے ایمانی ہے۔۔۔ آپ کو ہمارا شکریہ ادا کرنا چاہیے تھا پوسٹ کرتے ہوئے۔۔۔ ہاہاہا

جی جی بجا کہا ۔۔اب تو بے ایمانی ہو گئی ۔۔سو کیا کیا جا سکتا ہے
اور ویسے بھی آپ پہلے آیئے پہلے پایئے کے اصولوں پر چلا کیجئے فائدے میں رہیئے گا
خیر احسان فرما دیتے ہیں آپ کا شکریہ ادا کرتے ہوئے بجز اسکے کہ یہ آپکے اخلاقی و قومی فریضے میں شامل تھا ۔

 

[مدیحہ گیلانی]

عمدہ کلام ہے ۔

بہت شکریہ جناب محب علوی صاحب! جیتے رہیئے

 

[سید شہزاد ناصر]

کیا ہی کہنے واہ واہ
کیا شہکار غزل پوسٹ کی ہے
لطف آ گیا پڑھ کر
ہر شب شبِ برات ہے، ہر روز عید ہے
سوتا ہوں ہاتھ گردنِ مینا میں ڈال کے
ہی شعر تو سن رکھا تھا اب پوری غزل بھی پڑھنے کو مل گئی
بہت خوش رہیں

 

[مدیحہ گیلانی]

کیا ہی کہنے واہ واہ
کیا شہکار غزل پوسٹ کی ہے
لطف آ گیا پڑھ کر
ہر شب شبِ برات ہے، ہر روز عید ہے
سوتا ہوں ہاتھ گردنِ مینا میں ڈال کے
ہی شعر تو سن رکھا تھا اب پوری غزل بھی پڑھنے کو مل گئی
بہت خوش رہیں

آپکا شکریہ شاہ صاحب۔ جیتے رہیئے

 

[صائمہ شاہ]

فاتح صاحب !
آپ کی ممنون ہوں کہ آپ کے دیے ہوئے ربط سے ہی ہمیں کلیات آتش ہاتھ لگی اور اسی میں سے یہ غزل ملی۔

یہ کون سا ربط ہے جس سے ہم محروم ہیں ؟

 

[صائمہ شاہ]

بہت عمدہ انتخاب مدیحہ

 

[مدیحہ گیلانی]

بہت عمدہ انتخاب مدیحہ

شکریہ صائمہ ۔

 

[مدیحہ گیلانی]

یہ کون سا ربط ہے جس سے ہم محروم ہیں ؟

کلیات آتش کا ربط صائمہ

 

[محمد وارث]

لاجواب۔

شکریہ مدیحہ صاحب، آتش کی خوبصورت غزل ارسال فرمانے کیلیے۔

 

[مدیحہ گیلانی]

لاجواب۔

شکریہ مدیحہ صاحب، آتش کی خوبصورت غزل ارسال فرمانے کیلیے۔

شکریہ محترم وارث صاحب۔