جگر سینے میں اگر ہو دلِ بیدارِ محبت - جگر مراد آبادی

[فرحان محمد خان]

سینے میں اگر ہو دلِ بیدارِ محبت
ہر سانس ہے پیغمبرِ اسرارِ محبت

وہ بھی ہوئے جاتے ہیں طرف دارِ محبت
اچھے نظر آتے نہیں آثارِ محبت

ہشیار ہو، اے بے خود و سرشارِ محبت
اظہارِ محبت ! ارے اظہارِ محبت

تا دیر نہ ہو دل بھی خبردارِ محبت
اک یہ بھی ہے اندازِ فسوں کارِ محبت

توہینِ نگاہِ کرم یار کہاں تک؟
دم لینے دے اے لذّتِ آثارِ محبت

سب پھونک دیئے خار و حس مذہب و ملت
اللہ رے ، یہ شعلہِ رُخسارِ محبت

کونین سے کیا اہلِ محبت کو سروکار؟
کونین ہے خود غاشیہ بردارِ محبت

جو عرش کی رفعت کو بھی اس در پہ جھکا دے
ایسا بھی کوئی جذبہِ سرشارِ محبت

میں نے انہیں تاریک فضاؤں میں بھی اکثر
دیکھے ہیں برستے ہوئے انوارِ محبت

ناصح کو ہے کیوں میری محبت سے سروکار
چہرے سے تو کھلتے نہیں آثارِ محبت

میں اور یہ غمگینِ غمِ عشق ، ارے توبہ!
تو ، اور یہ احساسِ گراں بارِ محبت

اب عرضِ محبت کی جگرؔ کیوں نہیں جُراَت
وہ سامنے ہیں ، گرم ہے بازارِ محبت​

جگر مراد آبادی​