شانِ قرآن --- فیض الرسول فیضان

[الف نظامی]

رہروانِ آگہی کا ہم سفر قرآن ہے
معرفت کی منزلوں کا راہبر قرآن ہے

گلشنِ حق و صداقت کی بہارِ بے خزاں
نخلِ توحید و رسالت کا ثمر قرآن ہے

دل کا اطمینان اور آنکھوں کی ٹھنڈک اِس میں ہے
کیفِ دل قرآن ہے نورِ نظر قرآن ہے

ابنِ آدم کے مسائل اس نے حل فرما دئیے
طبعِ انساں سے بخوبی بہرہ ور قرآن ہے

زندگانی کی شبِ تاریک میں ہے ضوفگن
ظلمتِ دارین میں نورِ سحر قرآن ہے

ہر فسانے میں حقیقت کا بھرا ہے اس نے رنگ
ہر زمانے میں بیاضِ معتبر قرآن ہے

آج اس دم توڑتی انسانیت کے کرب کا
ہے کوئی فیضان چارہ گر اگر ، قرآن ہے

(پروفیسر فیض الرسول فیضان)​