مومن شب تُم جو بزمِ غیر میں آنکھیں چُرا گئے ۔ مومن

[فرخ منظور]

غزل

شب تُم جو بزمِ غیر میں آنکھیں چُرا گئے
کھوئے گئے ہم ایسے کہ اغیار پا گئے

پوچھا کسی پہ مرتے ہو اور دم نکل گیا
ہم جان سے عناں بہ عنانِ صدا گئے

پھیلی وہ بُو جو ہم میں نہاں مثلِ غنچہ تھی
جھونکے نسیم کے یہ نیا گُل کھلا گئے

اے آبِ اشک آتشِ عنصر ہے دیکھنا
جی ہی گیا اگر نفسِ شعلہ زا گئے

مجلس میں اس نے پان دیا اپنے ہاتھ سے
اغیار سبز بخت تھے ہم زہر کھا گئے

اُٹھا نہ ضعف سے گُلِ داغِ جنوں کا بوجھ
قاروں کی طرح ہم بھی زمیں میں سما گئے

غیروں سے ہو وہ پردہ نشیں کیوں نہ بے حجاب
دم ہائے بے اثر مرے پردہ اُٹھا گئے

تھی بد گمانی اب نہیں کیا عشقِ حور کی
جو آ کے مرتے دم مجھے صورت دکھا گئے

تابندہ و جوان تو بختِ رقیب تھے
ہم تیرہ روز کیوں غمِ ہجراں کو بھا گئے

بیزار زندگانی کا جینا محال تھا
وہ بھی ہماری نعش کو ٹھوکر لگا گئے

واعظ کے ذکر مہرِ قیامت کو کیا کہوں
عالم شبِ وصال کے آنکھوں میں چھا گئے

جس وقت اس دیار سے اغیار بوالہوس
بدخوئیوں سے یار کی ہو کر خفا گئے

دنیا ہی سے گیا میں جوں ہی ناز سے کہا
اب بھی گمان بد نہ گئے تیرے، یا گئے

اے مومن آپ کب سے ہوئے بندۂ بتاں
بارے ہمارے دین میں حضرت بھی آ گئے

(مومن خان مومن)

 

[جیہ]

بہت خوب۔
مطلع تو بہت ہی خوب ہے۔ کھوئے گئے ہم ایسے کہ اغیار پا گئے۔ واہ

 

[فرخ منظور]

بہت خوب۔
مطلع تو بہت ہی خوب ہے۔ کھوئے گئے ہم ایسے کہ اغیار پا گئے۔ واہ

شکریہ جویریہ! مطلع کی وجہ سے ہی پوری غزل پوسٹ کرنا پڑ گئی۔

 

[کاشفی]

بہت ہی عمدہ سخنور صاحب۔۔

 

[فرخ منظور]

بہت ہی عمدہ سخنور صاحب۔۔

بہت شکریہ کاشفی صاحب!

 

[محمد وارث]

شکریہ جناب خوبصورت غزل پوسٹ کرنے کیلیے۔

مطلع تو سدا بہار ہے، اور مقطع بھی خوب ہے

 

[فرخ منظور]

شکریہ جناب خوبصورت غزل پوسٹ کرنے کیلیے۔

مطلع تو سدا بہار ہے، اور مقطع بھی خوب ہے

بہت شکریہ وارث صاحب۔ بہت عنایت۔