حسان خان
لائبریرین
دید کے قابل ہے رنگِ ارغواں زارِ شفق
دل رُبا ہے سرخیِ دامانِ زرتارِ شفق
آسماں پر موجزن جوئے شرابِ سرخ ہے
یا محیطِ چرخِ زنگاری سحابِ سرخ ہے
نقش بستہ آفتابِ شام کی تنویر ہے
جلوۂ آخر کی اک مٹتی ہوئی تصویر ہے
آئینے میں چرخ کے ہے عکسِ تصویرِ بہار
تابش افزائے نظر ہے یا فروغِ شعلہ زار
روئے زیبائے عروسِ شام کا پرتو ہے یہ
گوشۂ مغرب منور جس سے ہے وہ ضو ہے یہ
از سرِ نو پھوٹ نکلا ہے شبابِ چرخِ پیر
یا مئے احمر ہے زیبِ شیشۂ ابرِ مطیر
رنگ لایا ہے شفق بن کر شہیدوں کا لہو
لوحِ گردوں سے عیاں ہیں نقشِ خونِ آرزو
جلوۂ زریں فضا میں جاذبِ نظّارہ ہے
منظرِ رنگیں نگاہِ شوق کا گہوارہ ہے
قصرِ فردوسِ بریں کا دل نشیں قصہ ہے یہ
یا بہارِ بوستانِ خلد کا خاکہ ہے یہ
سرخ جوڑا لیلیِ شب نے کیا ہے زیبِ تن
روزِ روشن سے ہے ہم آغوش چوتھی کی دلہن
دیکھ لے چشمِ تماشا جُو یہ جلوہ دیکھ لے
کلکِ صناعِ حقیقی کا کرشمہ دیکھ لے
اے شفق! اے نقشِ دل آویزیِ ارژنگِ حُسن
اے طلسمِ رنگ! اے آئینۂ نیرنگِ حُسن
پرتوِ مہرِ مبیں کا رازِ سربستہ ہے تو
یا سرِ طاقِ فلک رنگین گلدستہ ہے تو
برق کی چشمک تری رنگیں ادائی پر نثار
کہکشاں کا نور اس جلوہ نمائی پر نثار
مایۂ تسکیں ہے تو ذوقِ نظر کے واسطے
دامنِ گلچیں ہے تو ذوقِ نظر کے واسطے
چرخ کے اسٹیج پر اک پردۂ رنگیں ہے تو
زینتِ دوشِ فلک یا چادرِ زریں ہے تو
کیف آور تیرا جلوہ ہے سکوتِ شام میں
آتشِ سیّال ہے لبریز تیرے جام میں
بادۂ گل رنگ کا تیرے مزا لیتا ہوں میں
تشنگیِ ذوقِ نظارہ بجھا لیتا ہوں میں
تیری رنگینی سے عقدہ کھل گیا یہ اے شفق
دفترِ ہفت آسماں کا تو سنہری ہے ورق
جو دکھاتے ہی جھلک اڑ جائے وہ سیماب ہے
بے ثباتی کا مرقع جلوۂ بے تاب ہے
محو ہو جاتے ہیں دم بھر میں ترے نقش و نگار
ہے یونہی وقفِ خزاں عمرِ دو روزہ کی بہار
جلوۂ گل تو ہے مشتاقِ تماشا کے لیے
منظرِ عبرت نما ہے چشمِ بینا کے لیے
(برق دہلوی)
منظومۂ ستمبر ۱۹۲۷
دل رُبا ہے سرخیِ دامانِ زرتارِ شفق
آسماں پر موجزن جوئے شرابِ سرخ ہے
یا محیطِ چرخِ زنگاری سحابِ سرخ ہے
نقش بستہ آفتابِ شام کی تنویر ہے
جلوۂ آخر کی اک مٹتی ہوئی تصویر ہے
آئینے میں چرخ کے ہے عکسِ تصویرِ بہار
تابش افزائے نظر ہے یا فروغِ شعلہ زار
روئے زیبائے عروسِ شام کا پرتو ہے یہ
گوشۂ مغرب منور جس سے ہے وہ ضو ہے یہ
از سرِ نو پھوٹ نکلا ہے شبابِ چرخِ پیر
یا مئے احمر ہے زیبِ شیشۂ ابرِ مطیر
رنگ لایا ہے شفق بن کر شہیدوں کا لہو
لوحِ گردوں سے عیاں ہیں نقشِ خونِ آرزو
جلوۂ زریں فضا میں جاذبِ نظّارہ ہے
منظرِ رنگیں نگاہِ شوق کا گہوارہ ہے
قصرِ فردوسِ بریں کا دل نشیں قصہ ہے یہ
یا بہارِ بوستانِ خلد کا خاکہ ہے یہ
سرخ جوڑا لیلیِ شب نے کیا ہے زیبِ تن
روزِ روشن سے ہے ہم آغوش چوتھی کی دلہن
دیکھ لے چشمِ تماشا جُو یہ جلوہ دیکھ لے
کلکِ صناعِ حقیقی کا کرشمہ دیکھ لے
اے شفق! اے نقشِ دل آویزیِ ارژنگِ حُسن
اے طلسمِ رنگ! اے آئینۂ نیرنگِ حُسن
پرتوِ مہرِ مبیں کا رازِ سربستہ ہے تو
یا سرِ طاقِ فلک رنگین گلدستہ ہے تو
برق کی چشمک تری رنگیں ادائی پر نثار
کہکشاں کا نور اس جلوہ نمائی پر نثار
مایۂ تسکیں ہے تو ذوقِ نظر کے واسطے
دامنِ گلچیں ہے تو ذوقِ نظر کے واسطے
چرخ کے اسٹیج پر اک پردۂ رنگیں ہے تو
زینتِ دوشِ فلک یا چادرِ زریں ہے تو
کیف آور تیرا جلوہ ہے سکوتِ شام میں
آتشِ سیّال ہے لبریز تیرے جام میں
بادۂ گل رنگ کا تیرے مزا لیتا ہوں میں
تشنگیِ ذوقِ نظارہ بجھا لیتا ہوں میں
تیری رنگینی سے عقدہ کھل گیا یہ اے شفق
دفترِ ہفت آسماں کا تو سنہری ہے ورق
جو دکھاتے ہی جھلک اڑ جائے وہ سیماب ہے
بے ثباتی کا مرقع جلوۂ بے تاب ہے
محو ہو جاتے ہیں دم بھر میں ترے نقش و نگار
ہے یونہی وقفِ خزاں عمرِ دو روزہ کی بہار
جلوۂ گل تو ہے مشتاقِ تماشا کے لیے
منظرِ عبرت نما ہے چشمِ بینا کے لیے
(برق دہلوی)
منظومۂ ستمبر ۱۹۲۷
آخری تدوین:
