شفیق خلش شفیق خلش ::::: اُمید تھی تو، اگرچہ نہ تھی عیاں بالکل ::::: Shafiq Khalish

[طارق شاہ]

غزلِ
شفیق خلش ​

اُمید تھی تو، اگرچہ نہ تھی عیاں بالکل
ہُوئی کِرن وہی دِل کی ہے اب نہاں بالکل​

کِھلے نہ پُھول ہیں دِل میں، نظردُھواں بالکل
بہار آئی بھی بن کر خَلِش، خِزاں بالکل​

کہا ہے دِل کی تسلّی کو بارہا خود سے
ہم اُن کو بُھول چُکے ہیں، مگرکہاں بالکل​

جو اُٹھتے دستِ زلیخا ہمارے دامن پر
نہ ہوتی یوسفِ کنعاں سی داستاں بالکل​

جَھلک نہ دُور سے کوئی، نہ روشنی کا سُراغ
سِرا سُرنگ کا، آنکھوں سے ہے نہاں بالکل​

ذرا سی ہجر میں احساس ہو چلا مجھ کو
مِری حیات یہ، اُس بِن ہے رائیگاں بالکل ​

نہ اب وہ زخم پہ مرہم، نہ گھر تو آؤ، خلش
بدل چُکا ہے محبّت کا سب سماں بالکل​

شفیق خلش​