شفیق خلش شفیق خلش ::::: میں نے فرطِ شوق میں دی تھی زباں جاتا رہا ::::: Shafiq Khalish

[طارق شاہ]

غزل
شفیق خلش

میں نے فرطِ شوق میں دی تھی زباں جاتا رہا
ورنہ مِلنے کو کسی سے کب کہاں جاتا رہا

میں لبِ دم تھا غمِ فُرقت میں لاحق وہم سے
جی اُٹھا آنے پہ اُس کے، ہر گُماں جاتا رہا

وہ جو آئے جیسے آئیں زندگی کی رونقیں
'میری تنہا زندگی کا سب نشاں جاتا رہا'

شوق اب بھی جی کو ہیں لاحق وہی پہلے جو تھے
کب بَھلا دِل سے مِرے عِشق بُتاں جاتا رہا

ہے گِلہ یہ وقت سے، مجھ کو ذرا مُہلت نہ دی
حسرتیں روندے مِری نامہرباں جاتا رہا

تھی بہت کوشش کہ اُن کا قُرب ہو حاصِل مجھے
ہر عمل اِس مد میں لیکن رائیگاں جاتا رہا

ہم ہُوئے رُسوا وہاں بھی جس جگہ تھے اجنبی
کون جانے لے کے جُھوٹی داستاں جاتا رہا

اب کہاں بیٹھیں جہاں سے دِید ہو حاصل، خلش!
اُس گلی اپنا بنایا آستاں جاتا رہا

شفیق خلش ​

 

[عمر سیف]

وہ جو آئے جیسے آئیں زندگی کی رونقیں
'میری تنہا زندگی کا سب نشاں جاتا رہا'

بہت خوب