فاتح
لائبریرین
دل کو تسکین نہیں اشکِ دما دم سے بھی
اس زمانے میں گئی ہے برکت غم سے بھی
ہم نشیں کیا کہوں اس رشکِ مہِ تاباں بِن
صبحِ عید اپنی ہے بدتر شبِ ماتم سے بھی
کاش اے جانِ المناک، نکل جاوے تُو
اب تو دیکھا نہیں جاتا یہ ستم ہم سے بھی
آخرِ کار محبت میں نہ نکلا کچھ کام
سینۂ چاک و دلِ پژمردہ مژہ نم سے بھی
آہ ہر غیر سے تا چند کہوں جی کی بات
عشق کا راز تو کہتے نہیں محرم سے بھی
دوریِ کوچہ میں اے غیرتِ فردوس تری
کام گذرا ہے مرا گریۂ آدم سے بھی
ہمت اپنی ہی تھی یہ میرؔ کہ جوں مرغِ خیال
اک پریشانی میں گذرے سرِ عالم سے بھی
میر تقی میرؔ
