صورِ سرافیل سے پہلے۔ احمد اقبال ترمذی

[ترمذی]

صورِ سرافیل سے پہلے​

​

کاغذ تھامے سوچ رہا ہوں لکھنا کیا ہے​

لکھنا کیا ہے؟ نطقِ قلم پر حرف سوال سلگتا ہے​

لفظوں کے اوسان خطا ہیں​

معنی کے پُر پیچ بدن میں​

خوف زدہ کہرام بپا ہے​

وحشتِ مقتل سناٹے میں ٹہل رہی ہے​

ہر آہٹ سے دیدہ ء قاتل جھانک رہا ہے​

منظر کی ہیبت کا عالم​

آنکھ کو پتھر کرنے کا اعجاز لئے ہے​

بے اندازہ آوازوں سے واقف سمعِ کُہنہ​

صوتِ نامعلوم کے ڈرسے​

اپنے سَلبْ کئے جانے کی آپ دعائیں مانگ رہی ہے​

دوشِ ہوا پہ تیرتی پھرتی​

نامعلوم سی بو کے ڈرسے​

قوت شامہ کانپ رہی ہے​

آب وخور کے ہجر کے مارے منہ کے اندر​

ایک زُباں بے چاری ہانپ رہی ہے​

لمسِ حیات سے خائف ہو کر​

سمٹی روحیں ، لرزاں ترساں​

اپنے جسم کی معدومی کی​

آپ دعائیں مانگ رہی ہیں​

جانے کن احوال میں گم ہے​

ارض خدا پر اس کا خلیفہ​

میں کیا لکھوں؟​

​

(احمد اقبال ترمذی)​

 

[فاتح]

واہ وا سبحان اللہ
اپنے آغاز سے ہی قاری کو جکڑ لینے والی ایک انتہائی خوبصورت نظم۔۔۔

کاغذ تھامے سوچ رہا ہوں لکھنا کیا ہے

لکھنا کیا ہے؟ نطقِ قلم پر حرف سوال سلگتا ہے​

لفظوں کے اوسان خطا ہیں​

معنی کے پُر پیچ بدن میں​

خوف زدہ کہرام بپا ہے​

کیا کہنے احمد بھائی

 

[منصور آفاق]

بہت خوبصورت نظم ترمذی صاحب ۔۔۔۔۔۔۔۔آپ نے جو لکھنا تھا وہ لکھ دیا ہے۔۔۔

 

[محمداحمد]

بہت خوب!

کیا ہی اچھی نظم ہے۔

واہ واہ۔

 

[محمد وارث]

بہت خوب نظم ہے جناب ترمذی صاحب، کیا کہنے۔

 

[الف عین]

واہ، کیا نظم ہے!!! داد وصول کرنے آ جائیں یہاں اب۔

 

[ترمذی]

بہت خوب!

کیا ہی اچھی نظم ہے۔

آپ کا حسنِ نظر ہے ورنہ من آنم کہ من دانم

بہت خوب نظم ہے جناب ترمذی صاحب، کیا کہنے۔

واہ واہ۔

محمد وارث صاحب آپ کی حوصلہ افزائی بھی لا جواب ہے۔

واہ، کیا نظم ہے!!! داد وصول کرنے آ جائیں یہاں اب۔

آداب۔ حاضر ہوں جناب

 

[محمد خلیل الرحمٰن]

خوب صورت نظم ہے ترمذی صاحب۔ داد قبول فرمائیے

 

[سیدہ سارا غزل]

نہاہت خوبصورت ۔

 

[فائزہ رضوی]

واہ ،اچھی نظم ہے