جگر طبیعت ان دنوں بیگانۂ غم ہوتی جاتی ہے ۔ جگر مراد آبادی

[فرخ منظور]

طبیعت ان دنوں بیگانۂ غم ہوتی جاتی ہے
مرے حصے کی گویا ہر خوشی کم ہوتی جاتی ہے

سحر ہونے کو ہے، بیدار شبنم ہوتی جاتی ہے
خوشی منجملۂ اسبابِ ماتم ہوتی جاتی ہے

قیامت کیا یہ اے حسنِ دو عالم ہوتی جاتی ہے
کہ محفل تو وہی ہے دل کشی کم ہوتی جاتی ہے

وہی مے خانہ و صہبا، وہی ساغر، وہی شیشہ
مگر آوازِ نوشا نوش مدّھم ہوتی جاتی ہے

وہی ہیں شاہدو ساقی، مگر دل بجھتا جاتا ہے
وہی ہے شمع، لیکن روشنی کم ہوتی جاتی ہے

وہی شورش ہے لیکن جیسے موجِ تہ نشیں کوئی
وہی دل ہے مگر آواز مدّھم ہوتی جاتی ہے

وہی ہے زندگی لیکن جگرؔ یہ حال ہے اپنا
کہ جیسے زندگی سے زندگی کم ہوتی جاتی ہے

(جگرؔ مراد آبادی)​

 

[عبدالقادرخان]

مرے حصے کی گویا ہر خوشی کم ہوتی جاتی ہے۔۔۔
واہ!! حیات اک مستقل غم کےسوا کچھ بھی نہیں شائد
خوشی بھی آتی ہے تو آنسو بن کے آتی ہے

 

[منذر رضا]

فرخ منظور
جناب یہ غزل جگر کی کس کتاب میں ہے؟
میرے پاس جو نسخہ ہے کلیاتِ جگر کا، اس میں نہیں ہے یہ۔۔۔۔
رہنمائی کا منتظر ہوں!

 

[فرخ منظور]

فرخ منظور
جناب یہ غزل جگر کی کس کتاب میں ہے؟
میرے پاس جو نسخہ ہے کلیاتِ جگر کا، اس میں نہیں ہے یہ۔۔۔۔
رہنمائی کا منتظر ہوں!

جگر کی سب سے پہلی کتاب "آتشِ گُل"