طشتِ افلاک میں جتنے ہیں ستارے سارے

[الف نظامی]

طشتِ افلاک میں جتنے ہیں ستارے سارے
ذاتِ حق نے ترے نعلین پہ وارے سارے

جنبشِ لب کی بھی حاجت ہو بھلا کیوں ہم کو
اُنہیں ﷺ معلوم ہیں احوال ہمارے سارے

گنبد سبز تری رونق و شادابی پر
ہیں فدا خُلد کے رنگین نظارے سارے

ذکر رکھ آلِ محمد ﷺ کا لبوں پر تو بھی
ہم نے زنگ اِس سے دلوں کے ہیں اُتارے سارے

بڑی مدت ہوئی پر دل میں مرے تازہ ہیں
وہ شب و روز جو طیبہ میں گزارے سارے

میں نے گرداب میں جب اُن ﷺ کو پکارا عمار
چل کے خود پاس مرے آئے کنارے سارے

( سید عمار حسن )​