طارق شاہ
محفلین
غزل
غم کے ہاتھوں جو مِرے دِل پہ سماں گُذرا ہے
حادثہ ایسا ، زمانے میں کہاں گُذرا ہے
زندگی کا ہے خُلاصہ، وہی اِک لمحۂ شوق !
جو تِری یاد میں، اے جانِ جہاں ! گُذرا ہے
حالِ دِل غم سے ہے جیسے کہ، کسی صحرا میں!
ابھی اِ ک قافلۂ نوحہ گراں گُذرا ہے
بزمِ دوشیں کو کرو یاد،کہ اُس کا ہر رِند
رونقِ بارگۂ پِیر مُغاں گُذرا ہے
پا بہ گِل جو تھے، وہ آزاد نظر آتے ہیں
شاید اِس راہ سے، وہ سرو ِرَواں گُذرا ہے
اے اجَل ! جلد کَرَم کر ، کہ تِری فُرقت میں
مجھ پہ جو لمحہ بھی گُذرا ہے ، گراں گُذرا ہے
مجھ کو نِگراِنی دِل و دِیدہ ہُوئی ہے دُشوار
کوئی جب سے مِری جانب نگراں گُذرا ہے
حالِ دِل سُن کے وہ آزردہ ہیں، شاید اُن کو!
اِس حکایت پہ شکایت کا گُماں گُذرا ہے
وہ گُل افشانیِ گُفتار کا پیکر ،سالؔک !
آج کُوچے سے تِرے، اشک دشاں گُذرا ہے
عبدالمجید سالؔک
آخری تدوین:
