فیض عشق اپنے مجرموں کو پابجولاں لے چلا ۔ فیض احمد فیض

[فرخ منظور]

عشق اپنے مجرموں کو پابجولاں لے چلا​

​

دار کی رسیوں کے گلوبند گردن میں پہنے ہوئے​

گانے والے ہر اِک روز گاتے رہے​

پایلیں بیڑیوں کی بجاتے ہوئے​

ناچنے والے دھومیں مچاتے رہے​

ہم نہ اس صف میں تھے اور نہ اُس صف میں تھے​

راستے میں کھڑے اُن کو تکتے رہے​

رشک کرتے رہے​

اور چُپ چاپ آنسو بہاتے رہے​

لوٹ کر آ کے دیکھا تو پھولوں کا رنگ​

جو کبھی سُرخ تھا زرد ہی زرد ہے​

اپنا پہلو ٹٹولا تو ایسا لگا​

دل جہاں تھا وہاں درد ہی درد ہے​

گلو میں کبھی طوق کا واہمہ​

کبھی پاؤں میں رقصِ زنجیر​

اور پھر ایک دن عشق انہیں کی طرح​

رسن در گلو، پابجولاں ہمیں​

اسی قافلے میں کشاں لے چلا​

​

بیروت، جولائی ۱۹۸۱​

 

[نایاب]

واہ رے فیض سدا ہی " پابجولاں " چلا ۔۔۔۔۔۔۔ اور کہتا رہا " گیت آزادی " کے ۔۔۔۔۔۔۔۔۔