عندلیب شادانی کی خوبصورت غزل

[نظام الدین]

دیر لگی آنے میں تم کو، شکر ہے پھر بھی آئے تو

آس نے دل کا ساتھ نہ چھوڑا، ویسے ہم گھبرائے تو

شفق، دھنک، مہتاب، گھٹائیں، تارے، نغمے، بجلی، پھول

اس دامن میں کیا کیا کچھ ہے، دامن ہاتھ میں آئے تو

چاہت کے بدلے میں ہم نے بیچ دی اپنی مرضی تک

کوئی ملے تو دل کا گاہک، کوئی ہمیں اپنائے تو

کیوں یہ مہر انگیز تبسم، مدِنظر جب کچھ بھی نہیں

ہائے کوئی انجان اگر اس دھوکے میں آجائے تو

سنی سنائی بات نہیں یہ اپنے اوپر بیتی ہے

پھول نکلتے ہیں شعلوں سے چاہت آگ لگائے تو

جھوٹ ہے سب، تاریخ ہمیشہ اپنے آپ کو دہراتی ہے

اچھا میرا خواب جوانی تھوڑا سا دہرائے تو

نادانی اور مجبوری میں کچھ تو یاروں فرق کرو

اک بے بس انسان کرے کیا ٹوٹ کے دل آجائے تو

(عندلیب شادانی)​

 

[تلمیذ]

شفق، دھنک، مہتاب، گھٹائیں، تارے، نغمے، بجلی، پھول
اس دامن میں کیا کیا کچھ ہے، دامن ہاتھ میں آئے تو

واہ، بہت اعلیٰ!

 

[ادب دوست]

دیر لگی آنے میں تم کو، شکر ہے پھر بھی آئے تو

آس نے دل کا ساتھ نہ چھوڑا، ویسے ہم گھبرائے تو

واہ واہ واہ ... بہت سی غزلیں پڑھیں "تو" کی ردیف میں مگر کہیں بھی مطلع میں دو مرتبہ "تو" تاکید نہ مل سکا
واہ عندلیب صاحب ہی کا حصہ ہے واہ