غزل برائے اصلاح

[ارشد چوہدری]

افاعیل--مفعول فاعلاتُ مفاعیل فاعلن
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دیتا نہیں جواب وہ میرے سوال کا
رکھتا نہیں خیال وہ میرے ملال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تیرے خیال میں ہی گزاری ہے زندگی
عادی جو ہو گیا ہوں میں تیرے جمال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اچھے دنوں کا اب تو بہت انتظار ہے
لمبا ہی ہو گیا ہے یہ عرصہ زوال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اب تو بدل رہا ہے ہمارا خیال بھی
اب معترف ہوا ہوں میں تیرے خیال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تبدیل ہو رہا ہے ہمارا یہ دور اب
کھانا پڑے گا سب کو ہی کھانا حلال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ملنے کو آ گیا ہے وہ میری حیات میں
آیا اُسے خیال تھا میرے وصال کا ( کوئی ملا نہ اُس کو تو میری مثال کا )
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مجھ سے ملے بغیر وہ جاتا نہیں کہیں
اُس کو اگر ہے ڈر تو ہے میرے جلال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ارشد کا پیار اُس سے بھلایا نہ جا سکا
صدمہ اُسے تو اب بھی ہے میرے وصال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

[ارشد چوہدری]

الف عین

 

[فاخر]

عمدہ ہے ماشاءاللہ !
میں تو از خود ایک طالب علم ہوں کوئی استاد تو نہیں، اصلاح یا تنقید یا پھر رہنمائی تو حضرت الف عین قبلہ ہی فرمائیں گے ۔ اگر گراں نہ گزرے تو اولاً: گستاخی معاف کی شرط کے ساتھ کہ :’’فکر میں کئی جگہ بلندی کے ساتھ ساتھ یکلخت پستی بھی در آئی ہے‘‘۔
اس شعر کو دیکھیں ؎
’’تیرے خیال میں ہی گزاری ہے زندگی
عادی جو ہو گیا ہوں میں تیرے جمال کا‘‘
اس میں بلندی ہے جو میری ناقص اور طالب علمانہ نظر میں مستحسن اورآفریں’’نکتہ‘‘ ہے۔ مگر اس کے بعد ایک دوسرے شعر میں آپ نے یوں فرمایا ہے؎
’’مجھ سے ملے بغیر وہ جاتا نہیں کہیں
اُس کو اگر ہے ڈر تو ہے میرے جلال کا‘‘
اس شعر میں دیکھیں تو معاف کریں پستی نظر آرہی ہے ۔ غزل چوں کہ محبوب کے لیے کہی جاتی ہے اور اس میں جو پیرایہ آپ نے منتخب کیا ہے وہ یقیناً محبوب کے لیے ہی ہے، مگر عشق میں تو ’’نیاز‘‘ ہوا کرتا ہے،آپ نے ’’نیاز‘‘ کے بجائے خشونت یا پھر ہیبت کا رنگ اختیار کیا ہے جو عشق کی ’’نیازی‘‘ میں مستحسن نہیں ہے۔یہ میرا نقطہ نظر ہے جو کہ ہم محفل ، ہم زبان اور ہم ذوق ہونے کی وجہ سے عرض کردیا اگر گستاخی ہوگئی ہو تو معاف فرماکر مشکو ر فرمائیں گے۔

 

[الف عین]

دیتا نہیں جواب وہ میرے سوال کا
رکھتا نہیں خیال وہ میرے ملال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ درست

تیرے خیال میں ہی گزاری ہے زندگی
عادی جو ہو گیا ہوں میں تیرے جمال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ درست

اچھے دنوں کا اب تو بہت انتظار ہے
لمبا ہی ہو گیا ہے یہ عرصہ زوال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 'ہی ہو' صوتی طور پر اچھا نہیں لگتا، کیا عمران خان نے بھی مودی کی طرح اچھے دنوں کی آس دلائی ہے؟

اب تو بدل رہا ہے ہمارا خیال بھی
اب معترف ہوا ہوں میں تیرے خیال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ شتر گربہ 'ہمارا' اور 'ہوا ہوں'

تبدیل ہو رہا ہے ہمارا یہ دور اب
کھانا پڑے گا سب کو ہی کھانا حلال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ حلال کھانے کی مجبوری ہے.اور کھانا نہیں چاہتے؟ اس سے تبدیلی کا کیا تعلق؟

ملنے کو آ گیا ہے وہ میری حیات میں
آیا اُسے خیال تھا میرے وصال کا ( کوئی ملا نہ اُس کو تو میری مثال کا )
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ آیا بمعنی آنا مصدر سے ماضی یا شرطیہ 'آیا ایسا ہے یا ویسا' ؟اگر فعل ہے تو آیا کے بعد کوما کی شدید ضرورت ہے۔ وصال ذو معنی اچھا لگ رہا ہے

مجھ سے ملے بغیر وہ جاتا نہیں کہیں
اُس کو اگر ہے ڈر تو ہے میرے جلال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ایک پچھلے شعر میں بھی کچھ ایسے ہی جذبات کا احساس تھا اور میں نے لکھا بھی تھا کہ کیا محبوب ایسا ہولناک ہے؟ یہاں خود کو بھی ہولناک ثابت کر رہے ہو!

ارشد کا پیار اُس سے بھلایا نہ جا سکا
صدمہ اُسے تو اب بھی ہے میرے وصال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ اب بھی؟ مطلب نہیں ہونا چاہیے تھا یا صرف ماضی میں کچھ وقت کے لیے قابل قبول تھا؟یہاں وصال کی جگہ انتقال ہی استعمال کرو کہ کوئی وصل سے کنفیوز نہ ہو

 

[ارشد چوہدری]

عمدہ ہے ماشاءاللہ !
میں تو از خود ایک طالب علم ہوں کوئی استاد تو نہیں، اصلاح یا تنقید یا پھر رہنمائی تو حضرت الف عین قبلہ ہی فرمائیں گے ۔ اگر گراں نہ گزرے تو اولاً: گستاخی معاف کی شرط کے ساتھ کہ :’’فکر میں کئی جگہ بلندی کے ساتھ ساتھ یکلخت پستی بھی در آئی ہے‘‘۔
اس شعر کو دیکھیں ؎
’’تیرے خیال میں ہی گزاری ہے زندگی
عادی جو ہو گیا ہوں میں تیرے جمال کا‘‘
اس میں بلندی ہے جو میری ناقص اور طالب علمانہ نظر میں مستحسن اورآفریں’’نکتہ‘‘ ہے۔ مگر اس کے بعد ایک دوسرے شعر میں آپ نے یوں فرمایا ہے؎
’’مجھ سے ملے بغیر وہ جاتا نہیں کہیں
اُس کو اگر ہے ڈر تو ہے میرے جلال کا‘‘
اس شعر میں دیکھیں تو معاف کریں پستی نظر آرہی ہے ۔ غزل چوں کہ محبوب کے لیے کہی جاتی ہے اور اس میں جو پیرایہ آپ نے منتخب کیا ہے وہ یقیناً محبوب کے لیے ہی ہے، مگر عشق میں تو ’’نیاز‘‘ ہوا کرتا ہے،آپ نے ’’نیاز‘‘ کے بجائے خشونت یا پھر ہیبت کا رنگ اختیار کیا ہے جو عشق کی ’’نیازی‘‘ میں مستحسن نہیں ہے۔یہ میرا نقطہ نظر ہے جو کہ ہم محفل ، ہم زبان اور ہم ذوق ہونے کی وجہ سے عرض کردیا اگر گستاخی ہوگئی ہو تو معاف فرماکر مشکو ر فرمائیں گے۔

فاخر بیٹے آپ نے اچھے نقطے اُٹھائے ہیں ۔آئندہ خیال رکھوں گا اور ان اشعار کی تصحیح بھی کروں گا۔اسی لئے تو باتیں شیئر کی جاتی ہیں تاکہ نقائص کا پتہ چلتا رہے ۔ مجھے خوشی ہو گی اگر آئندہ بھی اپنے خیلات کا اظہار کرتے رہیں ۔ شکریہ

 

[فاخر]

فاخر بیٹے آپ نے اچھے نقطے اُٹھائے ہیں ۔آئندہ خیال رکھوں گا اور ان اشعار کی تصحیح بھی کروں گا۔اسی لئے تو باتیں شیئر کی جاتی ہیں تاکہ نقائص کا پتہ چلتا رہے ۔ مجھے خوشی ہو گی اگر آئندہ بھی اپنے خیلات کا اظہار کرتے رہیں ۔ شکریہ

میں آپ کے بیٹے کی عمر کا نہیں ہوں یہ جو تصویر لگی ہوئی نا یہ میرے پیارے بھتیجے کی تصویر ہے،یہ تمام اہل خانہ کے لیے بہت ہی پیارا ہے ؛اس لیے میں نے اس کی تصویر لگائی ہے۔ آپ تصویر پر نہ جائیں۔میری عمر تقریباً ستائیس اٹھائیس سال ہے،میں نے ایک مرتبہ اپنی تصویر لگائی تھی؛لیکن اب طبیعت نہیں چاہتی ہے خیر!
آپ کی رائے کا تہہ دل سے شکریہ ،بہت ممنون ہوں کہ آپ نے اسے ’’تنقید برائے تخریب‘‘ کے قبیل تصور نہیں کیا ؛بلکہ اس کو ’تعمیر‘ کے زمرے میں شمار کیا ہے۔ اس پر بھی آپ کا شکریہ ۔

 

[ارشد چوہدری]

اگر آپ کو بیٹا کہنا پسند نہیں آیا تو آپ کی مرضی۔ مجھے اللہ نے اولاد کی نعمت سے محروم رکھا ،یہ اُس کی مرضی ۔ اگر میرا بیٹا یا بیٹی ، جو بھی ہوتا وہ آپ سے بڑا ہوتا ۔کیونکہ میری عمر 65 سال ۔ میں نے آپ کی عمر دیکھ کر اور اپنی عمر کا لحاظ کرتے ہوئے لکھا تھا ۔ جس پر معذرت خواہ ہوں ۔ آئندہ بھائی کہ دوں گا ۔

 

[ارشد چوہدری]

تبدیلیوں کے بعد ایک با ر پھر
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دیتا نہیں جواب وہ میرے سوال کا
رکھتا نہیں خیال وہ میرے ملال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تیرے خیال میں ہی گزاری ہے زندگی
عادی جو ہو گیا ہوں میں تیرے جمال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اچھے دنوں کا اب تو بہت انتظار ہے
مشکل ہے کاٹنا تو یہ عرصہ زوال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میرا تو سوچنا بھی حقیقت سے دور تھا
حامی بنا ہوں تب ہی میں تیرے خیال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مجھ کو بچا لیا ہے خدا نے حرام سے
دیتا خدا مجھے تو ہے کھانا حلال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ملنے کو آ گیا ہے وہ میری حیات میں
آتا اسے خیال تھا میرے وصال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مجھ سے ملے بغیر وہ جاتا نہیں کہیں
رکھتا نہیں خیال وہ اہل و عیال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ارشد کا پیار اُس سے بھلایا نہ جا سکا
صدمہ اُسے بہت ہے میرے انتقال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

[ارشد چوہدری]

الف عین

 

[الف عین]

مشکل ہے کاٹنا تو یہ عرصہ زوال کا
تو پھر بھرتی کا آ گیا
مشکل ہے کاٹنا مجھے عرصہ زوال کا
بہتر ہو گا
میرا تو سوچنا بھی حقیقت سے دور تھا
حامی بنا ہوں تب ہی میں تیرے خیال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ واضح نہیں محبوب کا کون سا خیال؟

مجھ کو بچا لیا ہے خدا نے حرام سے
دیتا خدا مجھے تو ہے کھانا حلال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ وہ دے رہا ہے مجھ کو نوالہ حلال کا
بہتر ہو گا

ملنے کو آ گیا ہے وہ میری حیات میں
آتا اسے خیال تھا میرے وصال کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔' آتا' کہ بدلے 'شاید' کہیں تو!

مجھ سے ملے بغیر وہ جاتا نہیں کہیں
رکھتا نہیں خیال وہ اہل و عیال کا
... مزاحیہ شعر ہو گیا ہے یہ، اسے نکال ہی دیں

 

[فاخر]

اگر آپ کو بیٹا کہنا پسند نہیں آیا تو آپ کی مرضی۔ مجھے اللہ نے اولاد کی نعمت سے محروم رکھا ،یہ اُس کی مرضی ۔ اگر میرا بیٹا یا بیٹی ، جو بھی ہوتا وہ آپ سے بڑا ہوتا ۔کیونکہ میری عمر 65 سال ۔ میں نے آپ کی عمر دیکھ کر اور اپنی عمر کا لحاظ کرتے ہوئے لکھا تھا ۔ جس پر معذرت خواہ ہوں ۔ آئندہ بھائی کہ دوں گا ۔

میری عمر ستائیس-تیس سال ہے ؛ جب کہ آپ کی عمر 65 سال ہے اور مجھ کو ’’بیٹا ‘‘بھی کہہ دیا ہے اور پھر اللہ تعالیٰ نے آپ کو اولاد کی خوشی بھی نہیں دی ہے ،میں اولاد کی خوشی کو اچھی طرح سمجھتا ہوں اور نہ ہونے کا ملال بھی۔ مجھے شوق سے ’’بیٹا ‘‘ کہیں ۔ میرے والد گرامی بھی آپ کے ہی ہم عمر ہیں ؛اس لیے مجھے خوشی ہوگی ۔ بھائی نہ کہیں۔ مجھے یہ سن کر بہت قلق ہوا کہ اللہ تعالیٰ نے آپ کو کوئی اولاد نہیں دی اللہ تعالیٰ آپ کی اس خواہش کو پوری فرمائے جیسا کہ اسی خدا نے اپنے پیغمبر حضرت زکریا علیہ السلام کو آخری عمر میں یحییٰ علیہ السلام کی بشارت دی تھی ان شاءاللہ الرحمٰن وہی خدا آپ کو بھی یہ خوش خبری دے گا ۔ آمین ثم آمین۔

 

[ارشد چوہدری]

السلام علیکم ۔اچھا ہوا غلط فہمیاں دور ہوئیں ۔میں آپ کو بیٹا اور آپ کوشی سے انکل کہہ سکتے ہیں۔میری غزلوں پر رائے دیتے رہئے گا۔

 

[فاخر]

میری غزلوں پر رائے دیتے رہئے گا۔

چاچو ! میں اس قابل کہاں کہ آپ کی غزلوں پر کوئی رائے دوں وہ تو برسبیل تذکرہ مجھ سے غلطیاں سرزد ہوگئیں خیر ! افادہ و استفادہ ہوتا رہے گا ان شاءاللہ الرحمن

 

[ارشد چوہدری]

بیٹے آپ کو پرا حق ہے اپنی رائے دینے کا ۔ بعض اوقات کوئی معمولی اور سامنے کی بات بزرگ کے ذہن میں نہیں آتی اور کوئی کم عمر فوری طور پر نوٹ کر لیتا ہے ۔ ابھی چند لمحے قبل نئی غزل پوسٹ کی ہے ۔اس کو بھی دیکھنا ضرور ۔