غزل برائے اصلاح

[ارشد چوہدری]

بحر -- جمیل مربع سالم ( مفاعلاتن مفاعلاتن )
ملی ہے مجھ کو جفا کسی کی
میں چاہتا ہوں وفا کسی کی
۔۔۔۔۔۔۔۔۔۔۔۔۔
کسی کا سر کو جُھکا کے چلنا
ہے یاد مجھ کو حیا کسی کی
۔۔۔۔۔۔۔۔۔۔۔
نہ جرم کوئی کیا تھا میں نے
ملی ہے مجھ کو سزا کسی کی
۔۔۔۔۔۔۔۔۔۔۔۔۔۔۔۔۔
جو کچھ ہوا ہے تھا وہ مقدّر
نہیں تھی اس میں خطا کسی کی
۔۔۔۔۔۔۔۔۔۔۔۔۔۔۔
ہے آج ساری فضا معطّر
مہک رہی ہے حنا کسی کی
۔۔۔۔۔۔۔۔۔۔۔
اگر کرو گے وفا کسی سے
تمہیں ملے گی وفا کسی کی
۔۔۔۔۔۔۔۔۔۔۔۔۔۔۔۔۔
اسے کبھی بھی نہ بھول پایا
مجھے تھی بھائی ادا کسی کی
۔۔۔۔۔۔۔۔۔۔۔۔۔۔۔
میں آج بھی سُن رہا ہوں ارشد
جو آ رہی ہے صدا کسی کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

[ارشد چوہدری]

الف عین

 

[فلسفی]

ہے آج ساری فضا معطّر
مہک رہی ہے حنا کسی کی

واہ ارشد بھائی۔ ایک مشورہ ہے

فضا معطر ہے آج ساری
مہک رہی ہے حنا کسی کی

ویسے دوسرے مصرعے میں ہاتھوں کی مہندی وغیرہ زیادہ مناسب لگتا۔ بہتر تو سر بتائیں گے۔ آپ تخیل کی داد وصول کیجیے۔

 

[ارشد چوہدری]

پسندیدگی کا بہت بہت شکریہ ۔ذرا استادِ محترم بھی دیکھ لیں پھر جہاں تبدیلی کی ضرورت ہوئی تو تبدیل کر لیں گے

 

[الف عین]

واہ یہ اچھی غزل کہی ہے کہ اس میں کچھ مختلف خیالات باندھے ہیں، روانی البتہ بہتر ہو سکتی ہے۔
مطلع میں ایطا ہے وفا، جفا کے ساتھ صفا وغیرہ قوافی چاہیے جو نہیں ہیں
فلسفی نے ایک مصرع پر مشورہ دیا ہے لیکن اس سے زیادہ
جو کچھ ہوا ہے تھا وہ مقدّر
کی روانی مخدوش لگتی ہے
ہوا ہے جو وہ نصیب میں تھا
بہتر مصرع نہیں ؟
اسے کبھی بھی نہ بھول پایا
مجھے تھی بھائی ادا کسی کی
۔۔۔۔۔۔۔۔۔۔۔۔۔۔۔ بھی؟ شعر دو لخت لگتا ہے

میں آج بھی سُن رہا ہوں ارشد
جو آ رہی ہے صدا کسی کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ آج بھی' کی معنویت دوسرے مصرعے سے واضح نہیں ہوتی' کبھی جو آئی تھی' ہونا تھا جو وزن میں نہیں آتا

 

[ارشد چوہدری]

تصحیح کے بعد
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہوا ہے جو وہ نصیب میں تھا
نہیں تھی اس میں خطا کسی کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بُھلا سکا میں کبھی نہ اُس کو
لگی تھی اچھی ادا کسی کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بُلا رہی ہے تجھے وہ ارشد
میں سُن رہا ہوں صدا کسی کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

[ارشد چوہدری]

الف عین

 

[الف عین]

یہ تینوں اشعار درست ہو گئے ہیں