غزل برائے تنقید و تبصرہ و اصلاح

[مانی عباسی]

​

نہ تارِ اشک کو گر ہم لہو کرتے​

بھلا کیسے ادا رسمِ وضو کرتے​

​

کبھی جو بیٹھ کر تم گفتگو کرتے​

تمامِ ہجر کی ہم جستجو کرتے​

​

محبت کچھ نہیں ہوتی اگر تو کیوں​

سرِ بازار نیلام آبرو کرتے​

​

سنا ہے مرکزِ گیسوئے جاناں کی​

مریدانِ قمر ہیں آرزو کرتے​

​

حدودِ کفر سے آگے نکل جاتے​

اگر تم کو بیان اپنا عدو کرتے​

​

روایت توڑ کر سب بزمِ مے والے​

غم اپنے کب تلک نذرِ سبو کرتے​

​

ہٹا آنچل، دکھا کاجل، ہوئے پاگل​

عطا جز دلبری کیا خوبرو کرتے​

​

فقط تسکینِ دل کے واسطے مانی​

نمک سے زخمِ دل ہیں اب رفو کرتے...​

 

[الف عین]

اوزان تو درست ہیں اس غزل کے۔ مفاعیلن 3 بار کے افاعیل ہیں۔ بیانیہ کہیں کہیں اوبڑ کھابڑ ہو گیا ہے۔
نہ تارِ اشک کو گر ہم لہو کرتے
بھلا کیسے ادا رسمِ وضو کرتے
//پہلا مصرع اگر یوں کریں
نہ اپنے آنسوؤں کو ہم لہو کرتے

کبھی جو بیٹھ کر تم گفتگو کرتے
تمامِ ہجر کی ہم جستجو کرتے
//تمامِ ہجر؟ اچھا نہیں لگ رہا۔

محبت کچھ نہیں ہوتی اگر تو کیوں
سرِ بازار نیلام آبرو کرتے
// محبت کچھ گر نہ ہوتی تو آخر کیوں
بہتر ہو گا
 
سنا ہے مرکزِ گیسوئے جاناں کی
مریدانِ قمر ہیں آرزو کرتے
//شعر سمجھ میں نہین آیا۔

حدودِ کفر سے آگے نکل جاتے
اگر تم کو بیان اپنا عدو کرتے
//عدو بیان کرنا سے مراد محض ’کہنا‘ ہی ہے نا۔ اس سورت میں
بیاں تم کو اگر اپنا عدو کرتے
بہتر ہو گا۔

روایت توڑ کر سب بزمِ مے والے
غم اپنے کب تلک نذرِ سبو کرتے
//درست

ہٹا آنچل، دکھا کاجل، ہوئے پاگل
عطا جز دلبری کیا خوبرو کرتے
//پہلے مصرع کا بیانیہ پسند نہیں آیا۔ ’ہوئے پاگل‘ تو یقیناً حشو ہو گا۔

فقط تسکینِ دل کے واسطے مانی
نمک سے زخمِ دل ہیں اب رفو کرتے
//نمک سے رفو؟ نمک پاشی تو ممکن ہے لیکن رفو؟؟

 

[مانی عباسی]

فقط تسکینِ دل کے واسطے مانی
نمک سے زخمِ دل ہیں اب رفو کرتے
//نمک سے رفو؟ نمک پاشی تو ممکن ہے لیکن رفو؟؟

بعض اوقات درد کو بڑھانے سے درد کا علاج ہو جاتا ہے.۔۔۔۔۔۔۔

 

[مانی عباسی]

ہٹا آنچل، دکھا کاجل، ہوئے پاگل
عطا جز دلبری کیا خوبرو کرتے
//پہلے مصرع کا بیانیہ پسند نہیں آیا۔ ’ہوئے پاگل‘ تو یقیناً حشو ہو گا۔

حشو؟؟؟؟؟؟

 

[مانی عباسی]

 
سنا ہے مرکزِ گیسوئے جاناں کی
مریدانِ قمر ہیں آرزو کرتے
//شعر سمجھ میں نہین آیا۔

زلفوں میں چھپے مکھڑے کو چاند سے تشبیہ دی ہے جس کی آرزو مریدان قمر یعنی ستارے بھی رکھتے ہیں.۔۔۔۔۔۔۔

 

[مانی عباسی]

کبھی جو بیٹھ کر تم گفتگو کرتے
تمامِ ہجر کی ہم جستجو کرتے
//تمامِ ہجر؟ اچھا نہیں لگ رہا۔

مجھے تو صحیح لگا تھا.۔۔۔۔بہرحال کوئی متبادل لفظ تلاش کرتا ہوں

 

[مانی عباسی]

اوزان تو درست ہیں اس غزل کے۔ مفاعیلن 3 بار کے افاعیل ہیں۔ بیانیہ کہیں کہیں اوبڑ کھابڑ ہو گیا ہے۔
نہ تارِ اشک کو گر ہم لہو کرتے
بھلا کیسے ادا رسمِ وضو کرتے
//پہلا مصرع اگر یوں کریں
نہ اپنے آنسوؤں کو ہم لہو کرتے

اس طرح گرہ صحیح لگ رہی ہے ؟؟؟؟

 

[مانی عباسی]

محبت کچھ نہیں ہوتی اگر تو کیوں
سرِ بازار نیلام آبرو کرتے
// محبت کچھ گر نہ ہوتی تو آخر کیوں
بہتر ہو گا
 
حدودِ کفر سے آگے نکل جاتے
اگر تم کو بیان اپنا عدو کرتے
//عدو بیان کرنا سے مراد محض ’کہنا‘ ہی ہے نا۔ اس سورت میں
بیاں تم کو اگر اپنا عدو کرتے
بہتر ہو گا۔

یہاں آپ سے سو فیصد اتفاق کرتا ہوں ۔۔۔۔۔۔۔شکریہ خوش رہیں

 

[الف عین]

بعض اوقات درد کو بڑھانے سے درد کا علاج ہو جاتا ہے.۔۔۔ ۔۔۔ ۔

وہ تو درست ہے، لیکن میں نے لکھا تھا کہ نمک سے رفو کس طرح کیا جا سکتا ہے؟

زلفوں میں چھپے مکھڑے کو چاند سے تشبیہ دی ہے جس کی آرزو
مریدان قمر یعنی ستارے بھی رکھتے ہیں.۔۔۔ ۔۔۔ ۔

یہ سمجھنے کا شعر میں تو کوئی قرینہ نظر نہیں آتا

حشو؟؟؟؟؟؟

حشو اور زوائد ان الفاظ یا فقروں کو کہتے ہیں جن کو زبردستی بحر و اوزان پورے کرنے کے لئے لایا جاتا ہے۔


اور یہاں مجھ سے ٹائپو ہو گیا۔
// محبت کچھ گر نہ ہوتی تو آخر کیوں
در اصل اس کو یوں پڑھو
محبت کچھ نہ گر ہوتی تو آخر کیوں

 

[مانی عباسی]

حشو اور زوائد ان الفاظ یا فقروں کو کہتے ہیں جن کو زبردستی بحر و اوزان پورے کرنے کے لئے لایا جاتا ہے۔
ہٹا آنچل، دکھا کاجل، ہوئے پاگل

اس جملے میں کیفیت بیان کر رہا ہوں کب جب آنچل ہٹا تو کاجل بھری آنکھیں دکھیں اور پاگل ہوئے۔۔۔۔۔۔۔۔

 

[مانی عباسی]

وہ تو درست ہے، لیکن میں نے لکھا تھا کہ نمک سے رفو کس طرح کیا جا سکتا ہے؟
یہ سمجھنے کا شعر میں تو کوئی قرینہ نظر نہیں آتا

نمک سے درد میں اضافہ ہوتا ہے اور اور نیا درد پچھلے درد کا مرہم بن جاتا ہے

 

[الف عین]

نمک سے درد میں اضافہ ہوتا ہے اور اور نیا درد پچھلے درد کا مرہم بن جاتا ہے

لیکن یہ رفو کہاں ہوتا ہے بھائی، میں یہ کہنے کی کوشش کر رہا تھا، شاید ناکام رہا

 

[مانی عباسی]

لیکن یہ رفو کہاں ہوتا ہے بھائی، میں یہ کہنے کی کوشش کر رہا تھا، شاید ناکام رہا

مرہم سے رفو ہو جاتا ہے ناں زخم۔۔۔۔۔۔

 

[محمد یعقوب آسی]

جناب الف عین کے ارشادات کافی و شافی ہیں۔


مانی عباسی

 

[مانی عباسی]

جناب الف عین کے ارشادات کافی و شافی ہیں۔


مانی عباسی

او کے.۔۔۔شکریہ