غزل: بند کوزے میں اگر چاہو سمندر دیکھنا

[ایم اے راجا]

بند کوزے میں اگر چاہو سمندر دیکھنا
وحشتوں کا رقص میرے دل کے اندر دیکھنا

شکر کرنا تم، زباں پر تو کوئی قدغن نہیں
پاؤں کی زنجیر جب اپنا مقدر دیکھنا

سوچنا کیوں اس قدر تم سے محبت ہے ہمیں
تیرگی میں اک دیا تم بھی جلا کر دیکھنا

ذہن کی حدِ رسا تک بس اسی کو سوچنا
صرف اس کو پتلیوں کے آئینے پر دیکھنا

لمحہ لمحہ اک قیامت بن کے گذری زندگی
شامِ گریہ دیکھنا یا صبح محشر دیکھنا

اِک زباں سے شوق کا اظہار ہی کافی نہیں
وحشتِ دل چاہتی ہے آنکھ بھی تر دیکھنا

انتظارِ دوست کا اعجاز ہے یہ بھی عبید
آ گیا ہر موئے تن کو آنکھ بن کر دیکھنا​

عبید الرحمٰن عبید کی کتاب " جب زرد ہو موسم اندر کا" سے انتخاب​

 

[فرخ منظور]

شکریہ راجا صاحب - مقطع بہت ہی خوبصورت ہے -

 

[ایم اے راجا]

انتخاب کی پسندیدگی کا شکریہ، سخنور صاحب۔

 

[محمد وارث]

بہت اچھی غزل ہے، شکریہ راجا صاحب شیئر کرنے کیلیئے!

 

[محمداحمد]

سوچنا کیوں اس قدر تم سے محبت ہے ہمیں
تیرگی میں اک دیا تم بھی جلا کر دیکھنا
​

پھر یہی کہوں گا کہ بہت عمدہ انتخاب ہے۔

 

[ایم اے راجا]

آپ سب احباب کا بہت بہت شکریہ۔