ناسخ غزل: تو نے مہجور کر دیا ہم کو

[محمد تابش صدیقی]

تو نے مہجور کر دیا ہم کو
سخت رنجور کر دیا ہم کو

آپ چلتے ہیں غیر کو نہیں رنج
غم نے کافور کر دیا ہم کو

اپنی برقِ نگاہ سے تم نے
شجرِ طور کر دیا ہم کو

دل بنا عاشقی میں خود مختار
اور مجبور کر دیا ہم کو

ایسی تعریف کی، کہ اے زاہد!
عاشقِ حور کر دیا ہم کو

غم نہیں محتسب، جو توڑا خُم
نشہ نے چور کر دیا ہم کو

جس قدر ہم سے تم ہوئے نزدیک
اس قدر دور کر دیا ہم کو

انجمِ داغ و تیرہ بختی نے
شبِ دیجور کر دیا ہم کو

کبھی بارِ غمِ فراق اتار
تو نے مزدور کر دیا ہم کو

الفتِ ظاہری سے او مغرور!
تو نے مغرور کر دیا ہم کو

ہوئے دارین میں عدو مخذول
حق نے منصور کر دیا ہم کو

تو ہے عریاں تو دستِ وحشت نے
اے پری! عُور کر دیا ہم کو

خوب یا رب! دکھا دیا بتِ چیں
آج فغفور کر دیا ہم کو

ہو گیا مے سے نشۂ عرفاں
نار نے نور کر دیا ہم کو

تھے تو مقہور ہونے کے لائق
بارے مغفور کر دیا ہم کو
٭٭٭
استاد امام بخش ناسخؔ​

 

[سید لبید غزنوی]

کمال است۔۔۔۔۔بہت اچھی شراکت۔۔۔

تو نے مہجور کر دیا ہم کو
سخت رنجور کر دیا ہم کو

بالکل۔۔۔۔

جس قدر ہم سے تم ہوئے نزدیک
اس قدر دور کر دیا ہم کو

کچھ ایسا ہی لگ رہا ہے ۔۔۔۔

 

[محمد تابش صدیقی]

کمال است۔۔۔۔۔بہت اچھی شراکت۔۔۔

شکریہ جناب

 

[کلیم گورمانی]

ایسی تعریف کی، کہ اے زاہد!
عاشقِ حور کر دیا ہم کو

غم نہیں محتسب، جو توڑا خُم
نشہ نے چور کر دیا ہم کو

جس قدر ہم سے تم ہوئے نزدیک
اس قدر دور کر دیا ہم کو

انجمِ داغ و تیرہ بختی نے
شبِ دیجور کر دیا ہم کو

محترم تابش صدیقی صاحب آپکی پسند لاجواب ہے

 

[فرحان محمد خان]

دل بنا عاشقی میں خود مختار
اور مجبور کر دیا ہم کو

ایسی تعریف کی، کہ اے زاہد!
عاشقِ حور کر دیا ہم کو
واہ واہ واہ بہت خوووووب