غزل : دربدری کا دور ہے ، حرفِ سخن سرا میں رہ - اختر عثمان

[فرحان محمد خان]

غزل
دربدری کا دور ہے ، حرفِ سخن سرا میں رہ
معنی و مدعا میں جی ، رقص و رَمِ صبا میں رہ

شیشۂ تاکِ تازہ میں موج ِ مئے ہنر کہاں
کہنہ خُمار میں اتر ، نشّۂ پیش پا میں رہ

روشنی اور تیرگی دَور بہ دَور ساتھ ہیں
وقتِ نبود و بُود ہے ، لمحۂ سُرمہ سا میں رہ

نام و نمود کی ہوَس خوب سہی پہ تا بہ کے
خود میں کوئی صدا لگا ، کوچۂ اکتفا میں رہ

پیرہنِ بقا سخن ، طعنہ زنِ فنا سخن
تا نہ ورق بنے کفن ، نکہتِ گُل ! قبا میں رہ

اوّل و آخر ایک ہیں ، مست الست ایک سے
خواہشِ انتہا جھٹک ، لذّتِ ابتدا میں رہ

وہ جو کہیں رہٹ پہ تھی جی کی مہیب سائیں سائیں
اے دِل اُسی فضا میں رو ، اے دِل اُسی ہَوا میں رہ

کنجِ وفا شعار میں خوئے ہوَس کہیں نہیں
شاخِ جنوں پہ پھُول پھل ، میرے دل و دعا میں

اخترِؔ سوختہ نفس اور کوئی جگہ نہیں
طیبہ و کعبہ سے نکل کوفہ و کربلا میں رہ​

اختر عثمان​

 

[عباد اللہ]

شیشۂ تاکِ تازہ میں موج ِ مئے ہنر کہاں
کہنہ خُمار میں اتر ، نشّۂ پیش پا میں رہ