افتخار عارف غزل : سخنِ حق کو فضیلت نہیں مِلنے والی - افتخار عارف

[فرحان محمد خان]

غزل
سخنِ حق کو فضیلت نہیں مِلنے والی
صبر پر دادِ شجاعت نہیں مِلنے والی

وقتِ معلوم کی دہشت سے لرزتا ہوا دل
ڈُوبا جاتا ہے کہ مُہلت نہیں مِلنے والی

زندگی نذر گزاری تو مِلی چادرِ خاک
اِس سے کم پر تو یہ نعمت نہیں مِلنے والی

راس آنے لگی دُنیا تو کہا دِل نے کہ جا!
اب تُجھے درد کی دولت نہیں مِلنے والی

ہوسِ لقمۂ تر کھا گئی لہجے کا جلال
اب کِسی حرف کو حُرمت نہیں مِلنے والی

گھر سے نکلے ہوئے بیٹوں کا مقدر معلوم
ماں کے قدموں میں بھی جنت نہیں مِلنے والی

زندگی بھر کی کمائی یہی مِصرعے دو چار
اِس کمائی پہ تو عزت نہیں مِلنے والی​

افتخارعارف​

 

[یاسر شاہ]

واہ صاحب واہ عمدہ شراکت - ایک سے بڑھ کر ایک عالی شعر ہے -

 

[چودھری مصطفی]

ہوسِ لقمہ تر کھا گئی لہجے کا جلال
اب کسی حرف کو حرمت نہیں ملنے والی

 

[فاخر رضا]

گھر سے نکلے ہوئے بیٹوں کا مقدر معلوم
ماں کے قدموں میں بھی جنت نہیں مِلنے والی

 

[محمد عدنان اکبری نقیبی]

زندگی نذر گزاری تو مِلی چادرِ خاک
اِس سے کم پر تو یہ نعمت نہیں مِلنے والی

کیا بات ہے واہ ، بہت عمدہ ۔
زبردست انتخاب۔

 

[محمد تابش صدیقی]

لاجواب غزل اور انتخاب۔

 

[محمداحمد]

افتخار عارف کی لاجواب اور سدا بہار غزل ہے۔

حیرت ہوئی کہ یہ پہلے سے محفل میں موجود نہیں تھی۔

بہت شکریہ فرحان اس انتخاب کے لئے۔