قابل اجمیری غزل: سوزِ حیات مانگ، غمِ جاودانہ مانگ

[محمد تابش صدیقی]

سوزِ حیات مانگ، غمِ جاودانہ مانگ
اس جانِ مدعا سے مگر مدعا نہ مانگ

آوازِ بازگشت بھی مشکل سے آئے گی
غربت کو شرمسار نہ کر ہم نوا نہ مانگ

خونِ جگر سے نقشِ تمنا بنائے جا
اب زندگی سے فرصتِ ترکِ وفا نہ مانگ

میخانہ اک سراب، صنم خانہ اک طلسم
کچھ ان سے اعتبارِ نظر کے سوا نہ مانگ

جوشِ نمو سے کھلتے ہیں دشتِ وفا میں پھول
خونِ جگر سے کام لے، رنگِ حنا نہ مانگ

ان مفلسوں کے پاس کہاں دردِ زندگی
اہلِ کرم سے اپنی وفا کا صلا نہ مانگ
٭٭٭
قابلؔ اجمیری​

 

[محمد خلیل الرحمٰن]

واہ صاحب! کیا نغمگی ہے۔ خوبصورت غزل

 

[محمد تابش صدیقی]

واہ صاحب! کیا نغمگی ہے۔ خوبصورت غزل

شکریہ جناب
یہی تو قابلؔ کی سب سے نمایاں خصوصیت ہے۔