عزیز حامد مدنی غزل : سکوتِ شب کو غزل خواں کہو کہ نیند آئے - عزیز حامد مدنی

[فرحان محمد خان]

غزل
سکوتِ شب کو غزل خواں کہو کہ نیند آئے
جنوں کو سلسلہ جنباں کہو کہ نیند آئے

سرشتِ خاک ہے تخلیقِ بسترِ اضداد
بہم ہے عصمت و عصیاں کہو کہ نیند آئے

شرارِ جستۂ ساعت کی تاب ناکی کو
ستارۂ سرِ مژگاں کہو کہ نیند آئے

ضمیرِ سنگ کو شائستۂ خراد کہو
فسونِ لعل بدخشاں کہو کہ نیند آئے

رفوگرانِ جنوں کیا دلیلِ سوزن و تار
حدیثِ چاکِ گریباں کہو کہ نیند آئے

وفا کی قسطِ پریشاں ہے یہ اڑی ہوئی نیند
اک اور قسطِ پریشاں کہو کہ نیند آئے

کبھی کبھی یہ حریفِ زمانہ ہوتی ہے
حدیثِ جنبشِ مژگاں کہو کہ نیند آئے

رخِ نگار ہے مانندِ شیشۂ حلبی
چراغ مے ہے فروزاں کہو کہ نیند آئے

جنوں نواز کھلونوں کے ہر تغّیر کو
دکانِ خواب فروشاں کہو کہ نیند آئے

ہوا ہے روحِ زمستاں سے محوِ سرگوشی
اسی کو رمزِ بہاراں کہو کہ نیند آئے

خراب بوسۂ جاناں ہلاکِ جادوئے یار
مجھے کہا ہے کہو ہاں کہو کہ نیند آئے ​

عزیز حامد مدنی​