قابل اجمیری غزل: شمعیں روش روش پہ فروزاں کیے ہوئے

[محمد تابش صدیقی]

شمعیں روش روش پہ فروزاں کیے ہوئے
دشواریاں ہیں زیست کو آساں کیے ہوئے

یہ گردشِ زمانہ ہمیں کیا مٹائے گی
ہم ہیں طوافِ کوچۂ جاناں کیے ہوئے

ڈالی کمند ہم نے غزالانِ شہر پر
حیرانیوں کو آئینہ ساماں کیے ہوئے

ہم موت کی حدوں میں بھی نغمہ سرا رہے
غم کو دلیلِ عظمتِ انساں کیے ہوئے

تیرا خیال، تیری طلب، تیری جستجو
ہم جی رہے ہیں زیست پر احساں کیے ہوئے

وہ اک نگاہِ شوق کی تسکین کے لیے
گزرے کہاں کہاں سے چراغاں کیے ہوئے

نظروں کے اس فریب پہ سچائیاں نثار
وہ آ رہے ہیں زلفِ پریشاں کیے ہوئے

ہم نے بھی شامِ غم کی کاٹی ہیں منزلیں
لیکن قدم قدم پہ چراغاں کیے ہوئے

جینے کا حوصلہ ہے نہ مرنے کا اختیار
بیٹھا ہوں اک نگاہ سے پیماں کیے ہوئے

گزرا ہوں زندگی کے نشیب و فراز سے
راہوں کو اپنے ساتھ غزل خواں کیے ہوئے

قابلؔ وہ میرے ساتھ رہے ہیں تمام عمر
مجھ کو مری نگاہ سے پنہاں کیے ہوئے
٭٭٭
قابلؔ اجمیری​

 

[لئیق احمد]

ہم نے بھی شامِ غم کی کاٹیں ہیں منزلیں
لیکن قدم قدم پہ چراغاں کیے ہوئے

یہاں کاٹی ہیں یا کاٹیں ہیں درست ہے؟

 

[لئیق احمد]

تیرا خیال، تیری طلب، تیری جستجو
ہم جی رہے ہیں زیست پر احساں کیے ہوئے

زبردست خیال ہے۔

 

[محمد تابش صدیقی]

یہاں کاٹی ہیں یا کاٹیں ہیں درست ہے؟

تصحیح کا شکریہ۔

 

[لئیق احمد]

تصحیح کا شکریہ۔

مجھے اپنی تصحیح پر یقین نہیں تھا، میں نے سوال کیا تھا