غزل : لے آئی ہم کو گردشِ دوراں کباڑ میں : از محمد حفیظ الرحمٰن

[محمد حفیظ الرحمٰن]

غزل
از : محمد حفیظ الرحمٰن

لے آئی ہم کو گردشِ دوراں کباڑ میں
اب ڈھونڈیئے حیات کے ساماں کباڑ میں

گدڑی کا لعل گر نہ کہیں ، ان کو کیا کہیں
دیکھے ہیں ہم نے لعلِ بدخشاں کباڑ میں

ڈھونڈا عبث علاجِ غمِ دل جگہ جگہ
رکھا تھا جبکہ درد کا درماں کباڑ میں

چاہِ ذقن و چاہِ زنخداں کی کیا کہیں
جب رُل رہے ہوں ابرو و مژگاں کباڑ میں

یاروں نے پھر پلٹ کے ہماری خبر نہ لی
رکھا ہو جیسے فالتو ساماں کباڑ میں

دورِ فلک نے دن یہ دکھایا ہمیں حفیظؔ
اب ہم ہیں اور تصورِ جاناں کباڑ میں
​

 

[محمد خلیل الرحمٰن]

واہ وا۔ داد قبول فرمائیے

 

[مہدی نقوی حجاز]

بہت اعلیٰ جناب

 

[محمد حفیظ الرحمٰن]

جناب محمد خلیل الرحمٰن صاحب۔ داد کے لئے شکریہ قبول فرمایئے۔ بڑی نوازش۔

 

[محمد حفیظ الرحمٰن]

جناب مہدی نقوی حجاز صاحب۔ غزل کی پسندیدگی کے لئے بےحد شکریہ قبول فرمایئے- بڑی نوازش ۔

 

[ندیم مراد]

غزل اپنے موضوع کے اعتبار سے بہت اچھی ہے
صرف ردیف پسند نہیں ائی اگرچہ کہ آپ نے اسے اچھا نبھایا
اچھے اور خوبصورت الفاظ کا چناؤ بھی شاعری کا حصہ ہے
اچھی غزل کہنے پر داد قبول کیجئے

 

[الف عین]

اچھی غزل ہے۔ واہ

 

[محمد حفیظ الرحمٰن]

جناب ندیم مراد صاحب۔ غزل کی پسندیدگی کا بہت بہت شکریہ۔ ردیف کے بارے میں آپ کا اعتراض بالکل درست ہے۔ اصل میں یہ غزل ایک رات سوتے سے اٹھ کر لکھی تھی۔ تقریبا رات کے ساڑھے تین بجے آنکھ کھل گئی اور یہ غزل خود بخود بننے لگی۔ چونکہ آمد تھی اس لیےاس میں کوئی ترمیم نہیں کی۔ ردیف ہی کے باعث اس کو ایک طویل عرصے تک محفل میں نہیں لایا۔ آخر مجبور ہو گیا اور اسے محفل میں لے ہی آیا۔ داد کا بےحد شکریہ۔

 

[محمد حفیظ الرحمٰن]

استادِ مکرم جناب اعجاز عبید صاحب۔ سر غزل کی پسندیدگی کے لیے بے حد شکریہ قبول فرمایئے۔ بڑی نوازش۔

 

[محمداحمد]

یاروں نے پھر پلٹ کے ہماری خبر نہ لی
رکھا ہو جیسے فالتو ساماں کباڑ میں

بہت ہی خوب ۔۔۔۔! کیا ہی بات ہے۔

 

[محمد حفیظ الرحمٰن]

بہت شکریہ جناب محمد احمد صاحب۔ بڑی نوازش۔

 

[ملک عدنان احمد]

غزل
از : محمد حفیظ الرحمٰن

لے آئی ہم کو گردشِ دوراں کباڑ میں
اب ڈھونڈیئے حیات کے ساماں کباڑ میں

گدڑی کا لعل گر نہ کہیں ، ان کو کیا کہیں
دیکھے ہیں ہم نے لعلِ بدخشاں کباڑ میں

ڈھونڈا عبث علاجِ غمِ دل جگہ جگہ
رکھا تھا جبکہ درد کا درماں کباڑ میں

چاہِ ذقن و چاہِ زنخداں کی کیا کہیں
جب رُل رہے ہوں ابرو و مژگاں کباڑ میں

یاروں نے پھر پلٹ کے ہماری خبر نہ لی
رکھا ہو جیسے فالتو ساماں کباڑ میں

دورِ فلک نے دن یہ دکھایا ہمیں حفیظؔ
اب ہم ہیں اور تصورِ جاناں کباڑ میں
​

آہا، حفیظ آپ نے سب کو دکھا دیا
کیا کیا خزینہ رکھا تھا پنہاں کباڑ میں

 

[محمد حفیظ الرحمٰن]

بہت اچھا تبصرہ ہے ملک عدنان صاحب۔ بہت شکریہ۔ کیوں نہ پوری غزل ہو جائے۔ مزہ آئے گا۔ میں منتظر رہوں گا۔

 

[ملک عدنان احمد]

بہت اچھا تبصرہ ہے ملک عدنان صاحب۔ بہت شکریہ۔ کیوں نہ پوری غزل ہو جائے۔ مزہ آئے گا۔ میں منتظر رہوں گا۔

یہ بھی کوئی غزل کی زمیں ہے بھلا حفیظ؟
کہنا غزل بھی ہے کوئی آساں کباڑ میں؟

 

[مہدی نقوی حجاز]

برسوں پھرے ہیں ہم تو حراساں کباڑ میں
پر ڈھنگ کا ملا نہیں ساماں کباڑ میں

گلشن کو چل کے جا نہ سکے ہم بہ پائے خود
اور جا رہے ہیں ابکہ خراماں کباڑ میں
!!

 

[طارق شاہ]

برسوں پھرے ہیں ہم تو حراساں کباڑ میں
پر ڈھنگ کا ملا نہیں ساماں کباڑ میں

گلشن کو چل کے جا نہ سکے ہم بہ پائے خود
اور جا رہے ہیں ابکہ خراماں کباڑ میں
!!

پانے کی جستجو میں تھے گرداں کباڑ میں
پایا نہ اِک بھی کام کا ساماں کباڑ میں

گلشن کو چل کے جا نہ سکیں ہم بہ پائے خود
لوگوں سے جب کہا بھی تو پھینکا کباڑ میں

یہ ہماری بذلہ سنجی :

لوگوں کی بھیڑ دیکھ کے نالاں ہوئے وہ یوں
ملنے کو ہم سے کہہ کے گئے ہیں کباڑ میں

 

[مہدی نقوی حجاز]

پانے کی جستجو میں تھے گرداں کباڑ میں
پایا نہ اِک بھی کام کا ساماں کباڑ میں

گلشن کو چل کے جا نہ سکیں ہم بہ پائے خود
لوگوں سے جب کہا بھی تو پھینکا کباڑ میں

یہ ہماری بذلہ سنجی :

لوگوں کی بھیڑ دیکھ کے نالاں ہوئے وہ یوں
ملنے کو ہم سے کہہ کے گئے ہیں کباڑ میں

واہ! گو اگر مقفی ہوجاتے تو مزہ دو آتشہ ہو جاتا شاہ صاحب۔ لیکن واہ، کیا موضوع لائے ہیں آپ کباڑ کے عنوان سے۔ یعنی آپ نے تو ہمیں بھی کباڑ میں شامل فرما دیا!