غزل : میرا ہر زخم میری سوچ سے گہرا نکلا : از : سید ابوبکر مالکی

[bhatkal]

میرا ہر زخم میری سوچ سے گہرا نکلا
مسکراتا ہوا پھر بھی میرا چہرہ نکلا
میری قسمت کہ کبھی پیاس نہیں بجھ پائی
میں سمندر سے گزرتا ہوا پیاسا نکلا
پیار دنیا کی ہر دیوار گرا دیتی ہے
جو بظاہر تھا پرایا وہی اپنا نکلا
یہ کوئی بھول تھی میری یا نظر کا دھوکہ
جو لگا مجھ کو سمندر وہی صحرا نکلا
ایک مجبور تڑپتا رہا خاموش تھے سب
میری انکھوں سے مگر خون کا قطرہ نکلا
تجھ سے امید وفا باندھ رکھی تھی میں نے
میں نے سوچا تھا کچھ اور مگر کیا نکلا
میں زمانے کی نگاہوں میں کھٹکتا ہی رہا
دل پہ پہرہ تو کبھی پیار پہ پہرہ نکلا
کون سنتا ہے زمانے میں کسی کا دکھڑا
میں جسے درد سناتا رہا بہرہ نکلا
کس لئے مجھ کو ڈراتا ہے زمانہ سید
میں جسے بھوت سمجھتا رہا سایا نکلا ​

(سید ابوبکر مالکی ۔ بھٹکل) ​

 

[پپو]

بھائی جی کہیں تعارف بھی کروادیں بہت شکریہ اردو محفل پر خوش آمدید

 

[شمشاد]

بھٹکل صاحب یہ آپ کا اپنا کلام ہے کیا؟

اردو محفل میں طرح مشاعرہ ہو رہا ہے، وہاں بھی اپنا کلام بھیج سکتے ہیں۔

 

[محمد وارث]

خوش آمدید مالکی صاحب اور خوب غزل ہے آپ کی۔

 

[مغزل]

مالکی صاحب ، اردو محفل میں صمیمِ قلب سے خوش آمدید آپ کی یہ غزل دیگر دو فورمز بشمول بزمِ اردو انجمن میں بھی پڑھنے کا شرف حاصل رہا ہے۔ سرور عالم راز صاحب یہاں بھی کرم فرماتے ہیں ۔ کسی بھی نوع کی مدد درکار ہو تو حکم کیجے گا۔ فی الوقت رسید حاضر ہے ، انشا اللہ بشرطِ فرصت حاضر ہوتا ہوں۔۔ آپ سے گزارش ہے کہ اپنے تعارف کی لڑی میں کرم فرمائیں ۔