غزل : نہ دلوں میں پاسِ وفا رہا، نہ جنوں میں تیشہ وری رہی - مولانا محمد عثمان کاشف

[فرحان محمد خان]

غزل
نہ دلوں میں پاسِ وفا رہا، نہ جنوں میں تیشہ وری رہی
نہ گلوں میں رنگِ طرب رہا، نہ جنوں میں بخیہ گری رہی

نہ ہمیں رہے نہ وہی رہے، جو رہی تو عِشوہ گری رہی
نہ طلب رہی نہ کرم رہا، نہ متاعِ زخمہ وری رہی

نہ وہ رنگِ پیرِ مُغاں رہا ، نہ ہوائے جام و سبو رہی
نہ وہ دل رہا ، نہ جنوں رہا ، نہ جنوں کی بے خبری رہی

نہ دماغِ رنج و الم رہا ، نہ صدائے بزم کہن رہی
نہ وہ جامِ مے کی کھنک رہی ، نہ کسی کی شیشہ بری رہی

نہ تری نظر کی نوازشیں ، نہ مری طلب کی نہایتیں
نہ وہ دل میں جوششِ مے رہی، جو رہی تو دردِ سری رہی

نہ وہ سوز و ساز طرب رہا ، نہ وہ تابناکیِ دل رہی
نہ وہ رہ رووں میں تڑپ رہی ، نہ وہ شانِ راہ بری رہی

نہ شہابِ رنگ چمن رہا، نہ وفائے اہلِ وطن رہی
جو خیال تھا وہ دبا رہا، جو شراب تھی وہ دھری رہی​

مولانا محمد عثمان کاشف​