غزل: ہے کسی ماں کی طرح نخلِ ثمر دار کا دکھ

[امین عاصم]

غزل​

ہے کسی ماں کی طرح نخلِ ثمر دار کا دکھ​

خوشہ چیں کیسے سمجھ سکتے ہیں اشجار کا دکھ​

​

کون چاہت سے تجھے دے گا ترے فن پر داد​

کس نے محسوس کیا ہے کسی فن کار کا دکھ​

​

تم کو فرصت ملے دنیا کے مشاغل سے اگر​

کبھی سوچو کسی مفلس، کسی نادار کا دکھ​

​

مَیں نے پھر بصرہ و بغداد کو جلتے دیکھا​

میں نہ بُھولا تھا ابھی کابُل و قندھار کا دکھ​

​

کبھی سیلاب، کبھی موسمِ بے آب کا ڈر​

ہم زمیں دار سمجھتے ہیں زمیں دار کا دکھ​

​

کتنی منہگی تھی وہ اک کانچ کی گڑیا عاصمؔ​

مجھ سے دیکھا نہ گیا طفلِ خریدار کا دکھ​

۔۔۔۔۔۔۔۔۔۔۔۔۔​

امین عاصمؔ​

​

 

[زبیر مرزا]

واہ جناب بہت خُوب

 

[نایاب]

بہت ہی خوب
کبھی سیلاب، کبھی موسمِ بے آب کا ڈر
ہم زمیں دار سمجھتے ہیں زمیں دار کا دکھ

 

[محمد وارث]

واہ واہ بہت خوبصورت غزل ہے جناب، لاجواب

 

[فائزہ رضوی]

غزل​

ہے کسی ماں کی طرح نخلِ ثمر دار کا دکھ​

خوشہ چیں کیسے سمجھ سکتے ہیں اشجار کا دکھ​

​

کون چاہت سے تجھے دے گا ترے فن پر داد​

کس نے محسوس کیا ہے کسی فن کار کا دکھ​

​

تم کو فرصت ملے دنیا کے مشاغل سے اگر​

کبھی سوچو کسی مفلس، کسی نادار کا دکھ​

​

مَیں نے پھر بصرہ و بغداد کو جلتے دیکھا​

میں نہ بُھولا تھا ابھی کابُل و قندھار کا دکھ​

​

کبھی سیلاب، کبھی موسمِ بے آب کا ڈر​

ہم زمیں دار سمجھتے ہیں زمیں دار کا دکھ​

​

کتنی منہگی تھی وہ اک کانچ کی گڑیا عاصمؔ​

مجھ سے دیکھا نہ گیا طفلِ خریدار کا دکھ​

۔۔۔ ۔۔۔ ۔۔۔ ۔۔۔ ۔​

امین عاصمؔ​

​

بہت اچھی غزل ہے۔

 

[الف عین]

اچھی غزل ہے، مبارک ہو

 

[امین عاصم]

السلام علیکم
آپ احباب کا دلی ممنون ہوں کہ آپ نے ناچیز کی حوصلہ افزائی فرمائی۔

 

[محمد خلیل الرحمٰن]

السلام علیکم
آپ احباب کا دلی ممنون ہوں کہ آپ نے ناچیز کی حوصلہ افزائی فرمائی۔

چار سال لگادیئے آپ نے شکریہ ادا کرنے میں

 

[ظہیراحمدظہیر]

چار سال لگادیئے آپ نے شکریہ ادا کرنے میں

دیر لگی آنے میں اُن کو ’’شکریے ‘‘ پھر بھی آئے تو