غزل: یہ مت کہو کہ بھیڑ میں تنہا کھڑا ہوں میں ٭ عزمؔ شاکری

[محمد تابش صدیقی]

یہ مت کہو کہ بھیڑ میں تنہا کھڑا ہوں میں
ٹکرا کے آبگینے سے پتھر ہوا ہوں میں

آنکھوں کے جنگلوں میں مجھے مت کرو تلاش
دامن پہ آنسوؤں کی طرح آ گیا ہوں میں

یوں بے رخی کے ساتھ نہ منہ پھیر کے گزر
اے صاحبِ جمال ترا آئنہ ہوں میں

یوں بار بار مجھ کو صدائیں نہ دیجیے
اب وہ نہیں رہا ہوں کوئی دوسرا ہوں میں

میری برائیوں پہ کسی کی نظر نہیں
سب یہ سمجھ رہے ہیں بڑا پارسا ہوں میں

وہ بے وفا سمجھتا ہے مجھ کو اسے کہو
آنکھوں میں اس کے خواب لیے پھر رہا ہوں میں
٭٭٭
عزمؔ شاکری​

 

[فرخ منظور]

میرا خیال ہے پہلے مصرع میں "بھیڑ" ہو گا نہ "بھیٹر"

 

[محمد تابش صدیقی]

میرا خیال ہے پہلے مصرع میں "بھیڑ" ہو گا نہ "بھیٹر"

جزاک اللہ خیر۔
دراصل آج کل امیج ٹو ٹیکسٹ کی سہولت سے فائدہ اٹھا رہا ہوں، تو کہیں کہیں مسائل رہ جاتے ہیں۔

 

[ظہیراحمدظہیر]

واہ! اچھا انتخاب ہے تابش بھائی ۔
تابش بھائی ، اب ٹائپو درست کرنے پر آہی گئے ہیں تو عنوان میں بھی درستی کردیجئے ۔ نیز تیسرے شعر میں آئینہ کو بھی آئنہ بنادیجئے۔
شاعر موصوف نے آخری شعر میں وہی غلطی کی ہے کہ جو اب عام ہوتی جارہی ہے ۔ یعنی "اُس سے کہو" کے بجائے اُسے کہو لکھا ہے ۔

 

[فرخ منظور]

جزاک اللہ خیر۔
دراصل آج کل امیج ٹو ٹیکسٹ کی سہولت سے فائدہ اٹھا رہا ہوں، تو کہیں کہیں مسائل رہ جاتے ہیں۔

یہ کہاں سے فائدہ اٹھا رہے ہیں؟ ہمیں بھی بتائیے ہم بھی فائدہ اٹھائیں۔

 

[محمد تابش صدیقی]

یہ کہاں سے فائدہ اٹھا رہے ہیں؟ ہمیں بھی بتائیے ہم بھی فائدہ اٹھائیں۔

ٹیلی گرام کے امیج ٹو ٹیکس بوٹ سے
یہاں بوٹ کا نام اور اگلے مراسلوں میں طریقہ درج ہے۔