غزل

[Wajih Bukhari]

میں خوش نصیب ہوں کتنا کہ میرے پاس ہو تم
یہی تھی ایک تمّنا کہ میرے پاس ہو تم

بِتا دیا جو تمہارے بغیر یاد نہیں
خلش ہے اب، نہ تڑپنا کہ میرے پاس ہو تم

اگر سکوں ہے فقط اب تمہاری قربت میں
تو کیا جہان سے ڈرنا کہ میرے پاس ہو تم

ملے ہو مدّتوں کے بعد، اب یقین نہیں
یہ سچ ہے یا کوئی سپنا کہ میرے پاس ہو تم

سرور دل میں اترتا ہے جام جام ابھی
کٹھن ہے دل کا سنبھلنا کہ میرے پاس ہو تم

کوئی نہ یوں مرے نزدیک آسکا ہے کبھی
بجھا دو من کا سلگنا کہ میرے پاس ہو تم

مسافتیں ابھی باقی تھیں اور بھی لیکن
بس اور اب نہیں چلنا کہ میرے پاس ہو تم

شبِ فراق میں عادت سی بن گئی ہے مری
یہ جی میں سوچتے رہنا کہ میرے پاس ہو تم

تفکّرات کا کوہِ گراں ہے سینے پر
یہ بوجھ اب ہے اترنا کہ میرے پاس ہو تم

اداس دل ہے، نظر غم تلاش کرتی ہے
دل و نظر کو بدلنا کہ میرے پاس ہو تم

نہ جانے کب سے ترستا ہوں چند لفظوں کو
مجھے کبھی تو یہ کہنا کہ میرے پاس ہو تم

۔-۔- ۔۔-- ۔-۔- ۔۔-
۔-۔- ۔۔-- ۔-۔- --

 

[سفیر آفریدی]

.