غم دے بھانبھڑ خوشیاں تڑکن لگ پئے نیں

[عائشہ صدیقہ]

غم دے بھانبھڑ خوشیاں تڑکن لگ پئے نیں
ہتھاں دے وچ گبھرو پھڑکن لگ پئے نیں

کنج دا خوف زمانے دے وچ آ وڑیا
شیراں دے دل ہن دھڑکن لگ پئے نیں

ایہ کیہ لہر خزاں دی آئی ہر شے تے
ساوے پتر جمدے کھڑکن لگ پئے نیں

کیہڑی تھاویں شکر دپہراں کٹیں گا
دھپاں پی پی سائے سڑکن لگ پئے نیں

جھوٹھی یار تسلی دے نہ لاکاں نوں
وگدے پانی راہ وچ اڑکن لگ پئے نیں

نفرت ساڑ عداوت دے ہن کالے شاہ
بدل چار چفیرے کڑکن لگ پئے نیں

رشوت، بدعنوانی، جھوٹھ دی لعنت دے
وارث جی ہن شعلے بھڑکن لگ پئے نیں

وارث علی وارث
فیصل آباد