غم کی سوغات ہے ۔۔۔ خاموشی ہے۔اسلم کولسری

[چوہدری لیاقت علی]

غم کی سوغات ہے ۔۔۔ خاموشی ہے
چاندنی رات ہے ۔۔۔ خاموشی ہے
میں اکیلا نہیں، کہ باتیں ہوں
وہ مرے سات ہے ۔۔۔ خاموشی ہے
میری بربادیوں کی سازش میں
ضبط کا ہات ہے۔۔۔ خاموشی ہے
کیسا آسیب ہے کہ ہر جانب
جشنِ جذبات ہے ۔۔۔ خاموشی ہے
وقت کے زخم زخم ہونٹوں پر
ان کہی بات ہے ۔۔۔ خاموشی ہے
پھر اسی طرح گرم ماتھے پر
کانپتا ہاتھ ہے ۔۔۔ خاموشی ہے
صبحِ نو ہو کہ شام غم اسلم
گوشئہ ذات ہے ۔۔۔ خاموشی ہے