فنکار جیب کترا

[نظام الدین]

دہلی میں ایک جیب کترے تھے جن کا انگوٹھا قینچی کے پھل کی طرح دو دھارا تھا اور کلمے کی انگلی پتھر پر گھس گھس کر شیشے کی مانند سخت کرلی تھی۔ بس جہاں ان کی انگلی لگ جاتی تو قینچی کو پیچھے چھوڑ دیتی تھی۔ ایک صاحب کوئی باہر کے، خواجہ حسن نظامی کے ہاں آئے اور شکایت کی۔

’’دہلی کے جیب کترے کی بڑی دھوم سنی تھی۔ آج ہمیں دہلی کے بازاروں میں پھرتے چار دن ہوگئے ہیں لیکن کسی کو مجال نہیں ہوئی کہ ہماری جیب کی طرف آنکھ اٹھا کر بھی دیکھ لیں۔‘‘

خواجہ صاحب نے اس چٹکی باز کو بلوایا اور ان صاحب سے اس چٹکی باز کا آمنا سامنا کرایا۔ اس ہنرمند نے مسکرا کر کہا۔

’’خواجہ صاحب! میرے شاگردوں نے ان صاحب کا حلیہ بتایا تھا۔ چار دن سے انگرکھے کی اندر کی جیب میں پیتل کی آٹھ ماشیاں (آٹھ ماشا وزن کے سکے) ڈالے گھوم رہے ہیں اور وہ بھی گنتی کے چار۔ اب آپ ہی بتائیے کہ کون جعلی سکوں پر اپنی نیت خراب کرے گا۔‘‘

(اخلاق احمد دہلوی کی کتاب ’’پھر وہی بیان اپنا‘‘ سے اقتباس)

 

[سید انور محمود]

میری والدہ کا تعلق دہلی سے تھا، گلی قاسم جان میں اُن کا گھر تھا، میرا خیال ہے کوئی پچاس سال پہلے انہوں نے یہ سنایا تھا، آج آپکا مضمون پڑھکر بے ساختہ اُنکی یاد آگئی، اللہ تعالی اُنہیں اور آپکی والدہ کو کروٹ کروٹ جنت نصیب کرئے، آمین۔۔۔۔۔۔ خوش رہیں نظام ایدین صاحب۔۔۔۔۔۔۔۔