ماجد صدیقی :::: پتّا گرے شجر سے تو لرزہ ہمیں ہو کیوں -- Majid Siddiqi

[طارق شاہ]

غزلِ
ماجد صدیقی

پتّا گرے شجر سے تو لرزہ ہمیں ہو کیوں
گرتوں کے ساتھ گرنے کا کھٹکا ہمیں ہو کیوں

قارون ہیں جو، زر کی توقّع ہو اُن سے کیا
ایسوں پہ اِس قبیل کا دھوکہ ہمیں ہو کیوں

بے فیض رہبروں سے مرتّب جو ہو چلی
احوال کی وہ شکل، گوارا ہمیں ہو کیوں

ملتی ہے کج روؤں کو نفاذِ ستم پہ جو
ایسی سزا کا ہو بھی تو خدشہ ہمیں ہو کیوں

رکھیں نمو کی آس بھلا کیوں چٹان سے
ایسوں سے اِس طرح کا تقاضہ ہمیں ہو کیوں

ہم ہیں پھوار ابر کی، بوچھاڑ ہم نہیں
سختی کریں کسی پہ، یہ یارا، ہمیں ہو کیوں

بِیجا ہے جو اُگے گا نہ وہ، کشتِ خیر میں
ماجدؔ گماں جو ہو بھی تو ایسا ہمیں ہو کیوں

ماجد صدیقی​