مت پوچھ دل کی باتیں وہ دل کہاں ہے ہم میں - بیدل دہلوی

[کاشفی]

غزل​

(ابو المعانی مرزا عبدالقادر بیدل دہلوی مرحوم و مغفور رحمتہ اللہ علیہ)​

مت پوچھ دل کی باتیں وہ دل کہاں ہے ہم میں​

اُس تخم بے نشاں کا حاصل کہاں ہے ہم میں​

موجوں کی زد میں آئی جب کشتیِ تعیّن​

بحرِ فنا پکارا ساحل کہاں ہے ہم میں​

خارج نے کی ہے پیدا تمثال آئینے میں​

جو ہم سے ہے نمایاں داخل کہاں ہے ہم میں​

سوزِ نہاں میں کب کا وہ خاک ہو چکا ہے​

اب دل کو ڈھونڈتے ہو وہ دل کہاں ہے ہم میں​

جب دل کے آستاں پر عشق آن کر پکارا​

پردے سے یار بولا بیدلؔ کہاں ہے ہم میں​

 

[سید عاطف علی]

بہت زبر دست کاشفی بھائی ۔ بیدل کا کچھ اور اردو کلام بھی کہیں میسر ہے کیا ؟؟

 

[طارق شاہ]

بہت خوب شیئرنگ کاشفی صاحب

جب دل کے آستاں پر عشق آن کر پکارا
پردے سے یار بولا بیدلؔ کہاں ہے ہم میں

سوزِ نہاں میں کب کا وہ خاک ہو چکا ہے
اب دل کو ڈھونڈتے ہو، وہ دل کہاں ہے ہم میں

کیا کہنے

 

[مدیحہ گیلانی]

سوزِ نہاں میں کب کا وہ خاک ہو چکا ہے
اب دل کو ڈھونڈتے ہو وہ دل کہاں ہے ہم میں
واہ واہ لاجواب انتخاب ہے !
لطف آ گیا پڑھ کر