آصف شفیع لکھتے ہیں
آصف شفیع لکھتے ہیں:
ہما را عہد غلط تھا
ایک مدت سے نہ کچھ لکھا نہ سنا، حالانکہ میں پاکستان سے ابھی ہو کر آیا ہوں ، شاعروں سے ملاقات بھی ہوئی اور نوید صادق سے بھی بہت مختصر وقت کے لیے سہی مگر خالد علیم صاحب کے ہاں ملاقات ضرور ہوئی۔اس وقت وہ سید آلِ احمد کی کتاب چھپوا کر بہاولپور جا رہے تھے سننے سنانے کا موقع ہی نہیں ملا ورنہ عام طور پر اصرار کے بعد وہ دو تین غزلیں سنا دیا کرتے ہیں۔اگر معلوم ہوتا کہ انہوں نے اتنی اچھی غزل کہی ہوئی ہے تو سننے کا شرف ضرور حاصل کرتے۔ اس غزل میں نوید کے ہاں ایک عجب بے ساختگی اور تازہ کاری نمایاں ہو کر سامنے آئی ہے۔یہ غزل عہدِحاضر اور اس کے مسائل کا آئینہ دکھائی دیتی ہے۔معاشرے کی زبوں حالی اور ذہنی شکستگی کی کیفیت اس سے زیادہ اختصار کیساتھ کیسے بیان کی جا سکتی ہے کہ جو کچھ ہمارے ساتھ ہونا چاہئیے تھا ،نہیں ہو رہا۔یہ شعر معاشرتی ناہمواری اور ناا نصافی کی منہ بولتی تصویر بھی ہے اور اس کے خلاف احتجاج بھی۔
ہمیں کسی سے شکایت نہیں کوئی، لیکن
جو چاہیے تھا نہیں ہو رہا ہمارے ساتھ
چوتھا شعر اپنے آپ سے اور معاشرے سے کٹ جانے کا عمدہ اظہار ہے۔بقول میر
بے خودی لے گئی کہاں ہم کو
دیر سے انتظار ہے اپنا
مقطع کو غزل کے مزاج کے حوالے سے حاصلِ غزل کہا جا سکتا ہے کہ اس میں شاعر یا اپنے آپ کو یا پورے عہد کو غلط قرار دے رہا ہے۔ہمارے عہد میں کون سا کام ہے جو ٹھیک ہو رہا ہے،شکست و ریخت اس قدر ہے کہ معاشرے کا ہر فرد ٹوٹ پھوٹ کا شکار نظر آتاہے ۔مرحوم جمال احسانی نے بھی کچھ اسی قسم کا اظہار کیا تھا۔
تیرا انجام ہوا جو، وہی ہونا تھا جمال
اس جہاں میں تو کسی اور جہاں کا نکلا
جمال احسانی کا ایک اور شعر اسی حوالے سے۔
پھر کوئی ملال ہی غلط ہے
جب صورتِ حال ہی غلط ہے
مجمو عی طور پر یہ غزل نہ صرف عہدِ حاضر کے مسائل کا احا طہ کرتی ہے بلکہ فنی اور موضوعاتی اعتبار سے بھی تازہ کاری اور بے ساختگی کی نمایاں مثال ہے۔
محترمہ فرحت پروین کی رائے ڈسپلے نہیں ہوئی۔ان کی رائے کا انتظار رہے گا۔اسی طرح یعقوب آسی صاحب اور طارق بٹ صاحب کی گراں قدر آرا ابھی تک پڑھنے کو نہیں ملیں۔مسعود منور صاحب کی رائے پوری غزل کا احاطہ کر رہی ہے اور نہایت متناسب ہے۔
باقی احباب شاہین عباس ، رحمان حفیظ، خالد علیم اور باقی احمدپوری صاحب! سب کدھر ہیں؟
سب کی خدمت میں پر خلوص سلام۔
آصف شفیع
۱۲۔جون ۲۰۰۷ء
مکۃ المکرمہ ، سعودی عرب
asifshafee@hotmail.com
Cell: 0566382076
