مخمس بر غزلِ جناب مرزا اسد اللہ خان غالب ۲ - مرزا قربان علی بیگ خان سالک

[حسان خان]

طالع نہ مہر ہے نہ اذاں زیبِ گوش ہے​

نے طائروں کو زمزمہ سنجی کا ہوش ہے​

آغاز صبح کا ہے نہ پیدا خروش ہے​

ظلمت کدے میں اپنے شبِ غم کا جوش ہے​

اک شمع ہے دلیلِ سحر سو خموش ہے​

​

لکنت زباں میں چہرہ پسینے سے آب آب​

بندِ قبا کھلے ہوئے الٹا ہوا نقاب​

بے باکیاں ہیں اُتنی ہی جتنا تھا انقلاب​

مے نے کیا ہے حسنِ خود آرا کو بے حجاب​

اے شوق ہاں اجازتِ تسلیمِ ہوش ہے​

​

آلاتِ مے کشی نہیں جو ہو غمِ شکست​

نے محتسب کا ڈر کہ رہے فکرِ بندوبست​

ہم ہر جگہ ہیں بے خطر و خوف مے پرست​

دیدار بادہ ، حوصلہ ساقی، نگاہ مست​

بزمِ خیال میکدۂ بے خروش ہے​

​

سنتا ہے کون کس سےکہوں جا کے اپنا حال​

کٹتے ہیں رنج و غم میں شب و روز و ماہ و سال​

کہیئے تو کس طرح سے نہ ہو زندگی وبال​

نے مژدۂ وصال نہ نظارۂ جمال​

مدت ہوئی کہ آشتیِ چشم و گوش ہے​

​

ق​

​

چلتے ہو وہ ہی راہ کہ جو کچھ بتائے دل​

کرتے ہو وہ ہی کام کہ جس میں رضائے دل​

آگاہ ہو کہ حرص و ہوس ہے بنائے دل​

اے تازہ واردانِ بساطِ ہوائے دل​

زنہار اگر تمہیں ہوسِ ناؤ نوش ہے​

​

کیوں راہِ راست چھوڑ کے گم کردہ راہ ہو​

سنبھلو ذرا نہ میری طرح سے تباہ ہو​

پوچھو اگر تمہارا کوئی نیک خواہ ہو​

دیکھو مجھے جو دیدۂ عبرت نگاہ ہو​

میری سنو جو گوشِ نصیحت نیوش ہے​

​

اک عمر تک نگاہ بد و نیک پر نہ کی​

گویا تھی ایک چادرِ غفلت پڑی ہوئی​

آخر کو ہوش آئے تو آیا نظر یہی​

ساقی بہ جلوہ دشمنِ ایمان و آگہی​

مطرب بہ نغمہ رہزنِ تمکین و ہوش ہے​

​

رکھتا تھا دلکشی کا اثر گوشۂ بساط​

تھا غیرتِ بہار مگر گوشۂ بساط​

سمجھے ہوئے تھے باغِ نظر گوشۂ بساط​

یا شب کو دیکھتے تھے کہ ہر گوشۂ بساط​

دامانِ باغبان و کفِ گل فروش ہے​

​

یک سو صلائے بادہ و یک سو نوائے چنگ​

وہ جلوہ ہائے دلکش و وہ نغمہ ہائے چنگ​

دل میں ہوس شراب کی سر میں ہوائے چنگ​

لطفِ خرامِ ساقی و ذوقِ صدائے چنگ​

یہ جنتِ نگاہ وہ فردوسِ گوش ہے​

​

کیا پوچھتے ہو لطف اٹھایا جو بزم میں​

وہ رنگ تھا کہ بار نہ تھا غم کو بزم میں​

ہے رات ہی کی بات کہ دیکھا وہ بزم میں​

یا صبح دم جو دیکھئے آ کر تو بزم میں​

نے وہ سرور و سوز نہ جوش و خروش ہے​

​

نے دورِ جام ہے نہ وہ ساقی نہ وہ خوشی​

افسردہ اہلِ بزم ہیں بیزار زندگی​

اب کس سے پوچھئے کہ ہوئی کیا یہ برہمی​

داغِ فراقِ صحبتِ شب کی جلی ہوئی​

اک شمع رہ گئی ہے سو وہ بھی خموش ہے​

​

تعریف اس غزل کی ہمارے مقال میں​

گویا کہ آبِ خضر ہے جامِ سفال میں​

سالکؔ ؟؟؟ نہ ہو گر اپنے حال میں​

آتے ہیں غیب سے یہ مضامیں خیال میں​

غالبؔ صریرِ خامہ نوائے سروش ہے​

​

(مرزا قربان علی بیگ خان سالک)​

 

[حسان خان]

مجھے مقطع کا تیسرا مصرع متن میں سمجھ نہیں آیا۔ اگر کوئی پڑھ کر بتا سکے تو بڑی مہربانی ہوگی۔
کاشف عمران، فاتح محمد یعقوب آسی سید شہزاد ناصر محمد وارث مزمل شیخ بسمل فرخ منظور

 

[محمد یعقوب آسی]

جناب محمد وارث

 

[سید شہزاد ناصر]

اس بارے میں کچھ کہنا مشکل ہے
بغور مطالعہ سے تو یہ مصرع ذہن میں آتا ہے
سالک کہے پنہا نہو گر اپنی حال میں
باقی اللہ ہی بہتر جانتا ہے

 

[محمد وارث]

اس مصرعے کی کچھ شکلیں یوں ہو سکتی ہیں

سالک کہے پہان ہو گر اپنے حال میں

اور یوں بھی درست ہوگا

سالک کہے پہاں ہو گر اپنے حال میں

لیکن پہان یا پہاں کا مطلب کیا ہے؟ مجھے تو نہیں ملا۔

لیکن یہ کاتب کی غلطی بھی ہو سکتی ہے کہ ایک نقطہ زیادہ ڈال دیا، پہاں کی جگہ یہاں بھی ہو سکتا ہے

سالک کہے یہاں، ہو گر اپنے حال میں

اور اسطرح یہ مصرع باقی مصرعوں کے ساتھ مطابقت بھی قائم کر لیتا ہے۔

واللہ اعلم بالصواب

 

[محمد وارث]

اور یہ بھی واضح رہے کہ یہ اردو کی قدیم املا ہے، نون غنہ اور بڑی یے کا تصور تک نہیں۔

 

[شوکت پرویز]

جناب حسان خان صاحب!
بہت بہترین کلام ہے، شکریہ شیئر کرنے کے لئے۔

ذرا درج ذیل شعر کو دیکھیں۔۔

یا شب کو دیکھتے ہیں تھے کہ ہر گوشۂ بساط

دامانِ باغبان و کفِ گل فروش ہے​

​

شاید لفظ "ہیں" زیادہ ہے، اسے نکال دیں۔۔

 

[شوکت پرویز]

وہ جلوہ ہائے دلکش و وہ نغمہ ہائے چنگ

کیا یہ درست ہے؟؟؟

محمد وارث محمد یعقوب آسی

 

[محمد یعقوب آسی]

جناب شوکت پرویز
جواب نمبر 7 اور 8 کے حوالے سے۔
جیسا جناب محمد وارث نے اشارہ بھی کر دیا، کہ یہ پرانی اردو کتابت کا نمونہ ہے (نون غنہ اور بڑی ے)، وثوق سے یہ کہنا مشکل ہو گا کہ تب اور کیا کچھ مختلف رہا ہوگا۔ اس مصرعے کو پڑھنے کے مسئلے کو بھی اسی تناظر میں دیکھا جانا چاہئے۔ اس لحاظ سے مجھے جناب محمد وارث سے اتفاق ہے۔
وہ تو جناب حسان خان نے اس کو ’’آج کے خط‘‘ میں ڈھال دیا نہیں تو شاید ہم اس پر کوئی بات کر ہی نہ سکتے۔

بہت آداب۔