طارق شاہ
محفلین
غزلِ
مِرزا یاس عظیم آبادی، یگانہ
ازل سے سخت جاں آمادۂ صد اِمتحاں آئے
عذابِ چند روزہ یا عذابِ جاوِداں آئے
کنْول روشن تو ہو دِل کا پیامِ ناگہاں آئے
بَلا سے شامتِ پروانۂ آتش بجاں آئے
قفس بردوش پھرتے ہیں خِزاں آبادِ عالم میں !
اسیرانِ ازل گھر چھوڑ جنگل میں کہاں آئے
بہارستانِ عبرت میں یہ گُل کیا، خار کیا، خس کیا
سراپا سب کے سب آلودۂ رنگِ خزاں آئے
سواری بولنے والا نہ کوئی نوحہ خواں اپنا
اجَل کیا آئی، جیسے بے بُلایا میہماں آئے
خیالِ خام ہے یا معنئ موہوم، کیا جانیں
سمجھ میں رازِ فردا کیوں نصیبِ دُشمناں آئے
زہے احسانِ بے حاصل، کہ دِن کے دِن اسیروں کو
اجَل کے ساتھ حُکمِ بازگشتِ آشیاں آئے
وہی آغوشِ ساحل اور وہی منجدھار کے ڈوبے
پلٹ کر خاک میں مِلنے کہاں سے پھر کہاں آئے
حق اپنی دُھن کا پکّا، باطل اپنے زعم کا پُورا
الٰہی گفتگوئے صُلح کیوں کر درمیاں آئے
سکونِ بے دِلی میں کیا کہوں کیوں لہر پیدا ہے
مبادا غیب سے کوئی نویدِ ناگہاں آئے
حریمِ ناز کیا ہے، جلوہ گاہِ بے تماشا ہے
نِگاہِ یاس کہتی ہے کِدھر آئے، کہاں آئے
مرزا یاس یگانہ چنگیزی
مِرزا یاس عظیم آبادی، یگانہ
ازل سے سخت جاں آمادۂ صد اِمتحاں آئے
عذابِ چند روزہ یا عذابِ جاوِداں آئے
کنْول روشن تو ہو دِل کا پیامِ ناگہاں آئے
بَلا سے شامتِ پروانۂ آتش بجاں آئے
قفس بردوش پھرتے ہیں خِزاں آبادِ عالم میں !
اسیرانِ ازل گھر چھوڑ جنگل میں کہاں آئے
بہارستانِ عبرت میں یہ گُل کیا، خار کیا، خس کیا
سراپا سب کے سب آلودۂ رنگِ خزاں آئے
سواری بولنے والا نہ کوئی نوحہ خواں اپنا
اجَل کیا آئی، جیسے بے بُلایا میہماں آئے
خیالِ خام ہے یا معنئ موہوم، کیا جانیں
سمجھ میں رازِ فردا کیوں نصیبِ دُشمناں آئے
زہے احسانِ بے حاصل، کہ دِن کے دِن اسیروں کو
اجَل کے ساتھ حُکمِ بازگشتِ آشیاں آئے
وہی آغوشِ ساحل اور وہی منجدھار کے ڈوبے
پلٹ کر خاک میں مِلنے کہاں سے پھر کہاں آئے
حق اپنی دُھن کا پکّا، باطل اپنے زعم کا پُورا
الٰہی گفتگوئے صُلح کیوں کر درمیاں آئے
سکونِ بے دِلی میں کیا کہوں کیوں لہر پیدا ہے
مبادا غیب سے کوئی نویدِ ناگہاں آئے
حریمِ ناز کیا ہے، جلوہ گاہِ بے تماشا ہے
نِگاہِ یاس کہتی ہے کِدھر آئے، کہاں آئے
مرزا یاس یگانہ چنگیزی
