مسئلے کا حل نہ نکلا دیر تک ۔۔۔ شیام سندر نندا نور

[سین خے]

مسئلے کا حل نہ نکلا دیر تک
رات بھر جاگا بھی سوچا دیر تک
​

مسکرا کر اس نے دیکھا دیر تک
دل ہمارا آج دھڑکا دیر تک
​

آپ آئے ہیں تو یہ آیا خیال
بام پر کیوں پنچھی چہکا دیر تک​

ٹوٹتے ہی ان سے امید وفا
دل ہمارا پھر نہ دھڑکا دیر تک​

پھول اپنے رس سے ونچت ہو گیا
پھول پر بھنورا جو بیٹھا دیر تک​

کھل گیا اس کی وفاؤں کا بھرم
دے نہ پایا مجھ کو دھوکا دیر تک​

ناز سے وہ زلف سلجھاتے رہے
چھت پہ میری چاند چمکا دیر تک​

جس جگہ انسان کی عزت نہ ہو
اس جگہ پھر کیا ٹھہرنا دیر تک​

خوب رویا میں کسی کی یاد میں
اب کی بادل خوب برسا دیر تک​

چل دیا وہ سب کو تنہا چھوڑ کر
کاش وہ دنیا میں رہتا دیر تک​

وہ چھڑا کر اپنا دامن چل دیئے
رہ گیا میں ہاتھ ملتا دیر تک​

زہر سے لبریز ساغر کا مزہ
پیار میں ہم نے بھی چکھا دیر تک​

یہ زمانہ بے وفا ہے نورؔ جی
کب کسی کا ساتھ دے گا دیر تک​

(شیام سندر نندا نور)​

 

[عاطف ملک]

کھل گیا اس کی وفاؤں کا بھرم
دے نہ پایا مجھ کو دھوکا دیر تک

واہ۔۔۔۔۔۔عمدہ شراکت ہے
داد قبول کیجیے۔

مسئلے کا حل نہ نکلا دیر تک
رات بھر جاگ بھی سوچا دیر تک

اس میں غالباً ٹائپنگ کی غلطی ہے

جس جگہ انسان کی عزت نہ ہو
اس جگہ پھر کیا ٹھہرنا دیر تک

محترم محمد وارث
برادرم محمد ریحان قریشی
ٹھہرنا بطورِ قافیہ کچھ عجیب لگ رہا ہے مجھے!

 

[محمد ریحان قریشی]

ٹھہرنا بطورِ قافیہ کچھ عجیب لگ رہا ہے مجھے

صرف "دھوکا" اور "گا" میں الف اصلی روی ہے۔ مطلع میں وصلی روی والا قافیہ لایا ہی نہیں گیا اس لیے تکنیکی اعتبار سے تمام قوافی نادرست ہیں۔

 

[محمد عدنان اکبری نقیبی]

واہ ۔عمدہ شراکت

 

[سین خے]

واہ۔۔۔۔۔۔عمدہ شراکت ہے
داد قبول کیجیے۔

اس میں غالباً ٹائپنگ کی غلطی ہے

محترم محمد وارث
برادرم محمد ریحان قریشی
ٹھہرنا بطورِ قافیہ کچھ عجیب لگ رہا ہے مجھے!

شکریہ عاطف بھائی میں نے تو یہ غزل ریختہ سے کاپی پیسٹ کی ہے۔ اب اس میں کیا مسائل ہیں یہ تو آپ شاعر حضرات ہی جانیں۔ میں تو شاعرہ نہیں ہوں۔

 

[عاطف ملک]

شکریہ عاطف بھائی میں نے تو یہ غزل ریختہ سے کاپی پیسٹ کی ہے۔ اب اس میں کیا مسائل ہیں یہ تو آپ شاعر حضرات ہی جانیں۔ میں تو شاعرہ نہیں ہوں۔

بخدا ہم میں سے کسی نے آپ پر شاعری کا الزام نہیں لگایا۔۔۔۔یہ تو ویسے ہی اپنے علم کیلیے سوال پوچھا تھا
سلامت رہیں

سرگوشی

اور آسان آسان ڈشز کی ریسیپیز شیئر کرتی رہیں