موسم بدل گیا ہے ترے ساتھ کی طرح غزل نمبر 179 شاعر امین شارؔق

[امین شارق]

الف عین سر یاسر شاہ
مفعول فاعلات مفاعیل فاعِلن

موسم بدل گیا ہے ترے ساتھ کی طرح
چُھوٹا ہے اُس کا ساتھ ترے ہاتھ کی طرح

یادوں کے ابر دِل پہ اُمڈ آئے جب کبھی
آنکھوں سے اشک بہہ گئے برسات کی طرح

ہر ہار بھی قبول ہے اے یار تیرے سنگ
تیرے بغیر جِیت بھی ہے مات کی طرح

تُجھ کو یوں چاہُوں جیسے کوئی چاہے زِندگی
مانگُوں خُدا سے تُجھ کو مناجات کی طرح

دیتا ہے صدا گُذرا ہُوا وقت دوستو!
ماضی نہیں بدلتا ہے حالات کی طرح

تیرا خیال اب مُجھے رہتا ہے ہر گھڑی
تم یاد ہوگئے ہو حِکایات کی طرح

شارؔق کسی کے عِشق میں ہم بھی کبھی تھے قیس
وہ دِن ہوئے ہیں خُواب و خیالات کی طرح​

 

[صریر]

یادوں کے ابر دِل پہ اُمڈ آئے جب کبھی
آنکھوں سے اشک بہہ گئے برسات کی طرح

👍👍✨

دیتا ہے صدا گُذرا ہُوا وقت دوستو!
ماضی نہیں بدلتا ہے حالات کی طرح

دیتا صدا ہے گُذرا ہُوا وقت دوستو!

 

[الف عین]

الف عین سر یاسر شاہ
مفعول فاعلات مفاعیل فاعِلن

موسم بدل گیا ہے ترے ساتھ کی طرح
چُھوٹا ہے اُس کا ساتھ ترے ہاتھ کی طرح​

ساتھ چھوٹ سکتا ہے، بدلتا چہ معنی؟

یادوں کے ابر دِل پہ اُمڈ آئے جب کبھی
آنکھوں سے اشک بہہ گئے برسات کی طرح​

درست

ہر ہار بھی قبول ہے اے یار تیرے سنگ
تیرے بغیر جِیت بھی ہے مات کی طرح​

پہلے مصرع کی روانی مشکوک ہے، اے یار کے بغیر کوشش کرو

تُجھ کو یوں چاہُوں جیسے کوئی چاہے زِندگی
مانگُوں خُدا سے تُجھ کو مناجات کی طرح​

یوں چاہتا ہوں تجھ کو.... یا کم از کم
یوں تجھ کو چاہوں..
بہتر ہو گا

دیتا ہے صدا گُذرا ہُوا وقت دوستو!
ماضی نہیں بدلتا ہے حالات کی طرح​

صریر کی اصلاح سے وزن درست ہو جاتا ہے لیکن رواں نہیں رہتا، کچھ اور گرہ دو

تیرا خیال اب مُجھے رہتا ہے ہر گھڑی
تم یاد ہوگئے ہو حِکایات کی طرح​

حکایات یاد رکھنے کی اشیاء تو نہیں!

شارؔق کسی کے عِشق میں ہم بھی کبھی تھے قیس
وہ دِن ہوئے ہیں خُواب و خیالات کی طرح​

ٹھیک ہے

 

[امین شارق]

بہت شکریہ صریر بھائی غزل پسند کرنے کے لئے۔۔

 

[امین شارق]

ساتھ چھوٹ سکتا ہے، بدلتا چہ معنی؟

درست

پہلے مصرع کی روانی مشکوک ہے، اے یار کے بغیر کوشش کرو

یوں چاہتا ہوں تجھ کو.... یا کم از کم
یوں تجھ کو چاہوں..
بہتر ہو گا

صریر کی اصلاح سے وزن درست ہو جاتا ہے لیکن رواں نہیں رہتا، کچھ اور گرہ دو

حکایات یاد رکھنے کی اشیاء تو نہیں!

ٹھیک ہے

بہت نوازش ہے سر اصلاح کے لئے میں بہتر کرنے کی کوشش کرتا ہوں۔

 

[امین شارق]

الف عین سر علامہ اقبال صاحب کہہ گئے ہیں اب تلک یاد ہے قوموں کو حکایت ان کی اسی لئے حکایات والا شعر کہہ دیا تھا۔بقیہ تین اشعار کیا اب درست ہوگئے ہیں؟
تیرا خیال اب مُجھے رہتا ہے ہر گھڑی
تُم یاد ہوگئے ہو حِکایات کی طرح

ہر ہار بھی قبول ہے تیرا اگر ہو ساتھ
تیرے بغیر جِیت بھی ہے مات کی طرح

یُوں تُجھ کو چاہُوں جیسے کوئی چاہے زِندگی
مانگُوں خُدا سے تُجھ کو مناجات کی طرح

پیغام دے گیا ہے گیا وقت دوستو!
ماضی نہیں بدلتا ہے حالات کی طرح

 

[الف عین]

اقبال کے "ان کی حکایت" یاد رکھنے کی بات تمہارے "حکایات کی طرح یاد ہونا" سے مقابلہ نہیں کیا جا سکتا۔

ہر ہار بھی اچھا نہیں لگتا
کر لوں قبول ہار بھی، تیرا اگر ہو ساتھ

مناجات بھی مانگی نہیں جاتی، کی جاتی ہے
آخری شعر درست لگ رہا ہے