طارق شاہ
محفلین
منصوُر ہر اِک دَور میں بیدار ہُوا ہے
افسانہ کہِیں ختم سَر ِدار ہُوا ہے
مُدّت میں جو اُس شوخ کا دِیدار ہُوا ہے
تا دیر ، سمجھنا مجھے دُشوار ہُوا ہے
بے نام و نِشاں ایسا بھی اِک وار ہُوا ہے
ہر عزم، ہر اِک حوصلہ بیکار ہُوا ہے
کیا کیا نہ تپایا ہے اِسے آتش ِغم نے
تب جا کے یہ دِل شُعلۂ بیدار ہُوا ہے
اب حُسن سے کچھ کام، نہ جلوؤں سے سَروکار
اب عِشق ہی، خود عِشق کا معیار ہُوا ہے
فیضانِ غم ِ دوست سے حاصل ہے جو نِسبت!
ہر سانس حدیثِ لَب و رُخسار ہُوا ہے
کُچھ دِل کا تقاضا ہی نہ تھا عرضِ محبّت
کُچھ اُن کی نگاہوں کا بھی اِصرار ہُوا ہے
بے شاہد و ساقی بھی ،کبھی پی تو ہےلیکن!
جو گُھونٹ بھی اُترا ہے، وہ تلوار ہُوا ہے
ڈھانی ہے اِسی کو غَمِ دَوراں پہ قیامت
یہ دِل جو ابھی فِتنۂ بَیدار ہُوا ہے
کُچھ دِن سے ، عجب دِل کی نزاکت کا ہےعالَم
اِک حرفِ تسلّی بھی گراں بار ہُوا ہے
شبنم کی نظر میں نہیں تخصیص کسی کی
سَیراب ہر اِک پُھول، ہر اِک خار ہُوا ہے
کیا چیز تھی رِندانِ خوش انفاس کی صُحبت!
سُنتے ہیں، کہ واعظ بھی قدح خوار ہُوا ہے
کیا کہیے جگر ! کِس گُلِ رَعنا کی بَدَولت!
ہر شعر مِرا، شُعلۂ رُخسار ہُوا ہے
جِگر مرادآبادی
