طارق شاہ
محفلین
غزل
مُنہ تِرا دیکھ کے فق رنگِ گُلستاں ہوجائے
دیکھ کر زُلف کو سُنبل بھی پریشاں ہوجائے
یادِ قامت میں جو میں نالہ و فریاد کرُوں
پیشتر حشر سے، یاں حشر کا ساماں ہوجائے
جلوۂ مصحفِ رُخسار جو آجائے نظر !
حسرتِ بوسہ میں کافر بھی مُسلماں ہوجائے
آپ کے فیضِ قدم سے ہو بَیاباں گُلزار !
جائیے باغ تو، وہ گُلشنِ رضواں ہوجائے
ناز و انداز و اَدا سے جو چلیں چال حضُور !
جس جگہ پاؤں پڑے، گنجِ شہیداں ہوجائے
آفتِ گردشِ افلاس سے پاؤں جو نِجات
گردشِ چشم مجھے، گردشِ دَوراں ہوجائے
آپ دِکھلائیں جو اپنے رُخِ رنگِیں کی بہار
بُو کے مانند ہَوا، رنگِ گُلستاں ہوجائے
لاغر اِس درجہ ہُوا ہُوں، کہ جو لیٹوُں میں کبھی !
تارِ بستر مجھے وُسعت میں بیاباں ہوجائے
حسرتیں اِس میں ہُوا کرتی ہیں اکثر مدفُوں
کیا عَجَب خانۂ دِل گورِ غرِیباں ہوجائے
اکؔبر الٰہ آبادی