فنا بلند شہری میرا مذہب مرا کعبہ مرا ایماں تو ہے - فنا بلند شہری

[فرحان محمد خان]

تیرا شیدا ہوں مرے درد کا درماں تو ہے
میرا مذہب، مرا کعبہ ،مرا ایماں، تو ہے

جانِ جاں جانِ طلب حاصلِ درماں تو ہے
میرے جاناں مری تسکین کا ساماں تو ہے

بیٹھ کر سامنے کیوں تیری تلاوت نہ کروں
اے صنم میرے لئے صورتِ قرآں تو ہے

حرم و دہر میں پھرتے ہیں ترے سودائی
دل کے آئینہ میں اے دوست جاناں تو ہے

سر جھکاؤں میں کہاں شوقِ عبادت میں صنم
میرے سجدوں کی حقیقت میں تو پنہاں تو ہے

سوزِ الفت میں جلا کر مجھے کامل کر دے
میں ہوں پروانہ ترا شمعِ فروزاں تو ہے

میں فناؔ ہو کے بھی چھوڑوں گا نہ دامن تیرا
میری محفل مری خلوت مرے جاناں تو ہے​

فنا بلند شہری​

 

[لئیق احمد]

عشق حقیقی پر مبنی غزل لگتی ہے۔